"Tottenxem" yarim himoyachisi uchun kurashga "Valensiya" ham qo'shildi

"Tottenxem" yarim himoyachisi Tanguy Ndombele faoliyatini "Valensiya"da davom ettirishi mumkin, deb yozdi jurnalist Jyulen Maynar.

Manbaning xabariga ko'ra, futbolchi faoliyatini PSJda davom ettirmoqchi, shu bois u haligacha "Valensiya"ning taklifiga rozi bo'lmagan.

Qayd etilishicha, parijliklar yarim himoyachilaridan birini sotmasa, Ndombele bilan shartnoma imzolay olmaydi.

Ndombele joriy mavsum “Tottenxem” safida 16 ta o'yinda maydonga tushib, 2 ta gol urdi va 1 ta golli uzatmani amalga oshirdi. Yarim himoyachining London klubi bilan shartnomasi 2025 yilning 30 iyuniga qadar mo'ljallangan. Transfermarkt frantsiyalik futbolchini 38 million evroga baholamoqda.