Denis Cherishev: «Xixondan Madridga yayov borishga tayyor edim»

Rossiya termasi a'zosi, ayni payt ijara asosida «Valensiya» klubida to'p surayotgan Denis Cherishev rossiyalik ham-kasblarimiz bilan suhbatda «Real»dagi faoliyati, milliy jamoadagi o'zgarishlar va murabbiylari haqida so'z yuritdi.

Sobiq klubdoshlari haqida

- 11 yoshligimda bo'sh vaqtimni Nacho Fernandes va Markos Alonso bilan birga o'tkazardim. Hozir kam ko'rishamiz, asosan bir-birimizni tug'ilgan kun bilan tabriklaymiz. Yaqinda Nacho o'g'il farzandli bo'lganida, unga yozgandim. Umuman, maydonda to'qnash kelganimizda gaplashamiz. Telefonimdagi ro'yxatda raqami bor eng yorqin yulduz - Luka Modrich. Uni «Oltin to'p» sohibi bo'lgani bilan tabriklaganimda, u ham javob yozgandi.

Otasi haqida

- Ispaniyaga borganimda, otam Xixonning «Sporting» klubida o'ynardi, men ham shu jamoada mashg'ulotlarni boshlaganman. Otam menga yordam berish uchun faoliyatini ertaroq tugatgani - bor gap. Aynan uning sa'y-harakatlari tufayli faoliyatimni yo'lga qo'ydim. Meni «Real»ga chaqirishganida, otam 33 yoshda edi, unga La Liga va Segundadan takliflar tushgandi. U murabbiylikka o'qishni xohladi, ammo mening o'yinim yaxshi chiqishi uchun o'z faoliyatidan voz kechdi. Dastlab Madridga yakka o'zim borishim mumkin edi, biroq 11 yoshda ekanligimni inobatga olib, ota-onam birga yashashimiz kerak degan xulosaga kelishdi. Xayriyatki, hammasini uddaladik.

«Real»dan taklif olgani haqida

- Otamga Xixondan Madridgacha bo'lgan 500 kilometr masofani yayov bosib o'tishim mumkinligini aytgandim. «Real»dagi ilk kunim yodimda, avtobusda ketayotganda o'ylanib qolgandim: «Eng yaxshi 11 futbolchi shu erga to'plangan bo'lsa kerak». Avvaliga biroz asabiylashganman, ammo to'pni menga berishganida, hammasini unutganman.

Hali Rossiyaga qaytmaydi

- Zobnin va Kutyopov «Spartak»ka chaqirishdi, hazil tariqasida. O'ylashimcha, hali qaytishga erta. Kuchli chempionatlarda yanada rivojlanish uchun kuchim etadi, deb hisoblayman. La Liga - top chempionatlardan biri, u erda o'zimni juda yaxshi his qilyapman.

Ronaldu haqida

- U hamisha mashg'ulot o'tkazardi, hattoki, uyida ham. Tonggi soat 3-4larda qaergadir borsak, muzdekkina suvga tushib, tiklanardi. Haqiqiy professional. Ronaldu bilan birga o'ynayotganimizda, Irina Sheyk bilan uchrashib yurardi, ko'pincha rus so'zlardan foydalanardi: «vilka», «lojka»...

Mourinomi, Zidanmi yoki Cherchesov?

- So'zsiz Stanislav Salamovichni tanlayman. U termaga chaqirilmaganimda ham men bilan aloqani uzmagandi. «Vilyarreal»da kam o'ynayotganimni o'zim ham tushunib turardim. Ammo u baribir qo'ng'iroq qilib, o'zimni qanday sezayotganim bilan qiziqardi.

Mundialdagi ishtiroki haqida

- Men nima qildim? Hech nima. Jahon chempionati ajoyib o'tdi, ammo buni bir chetga surib, izlanishda davom etish kerak. Oldinda Evro saralashidagi muhim o'yinlar kutmoqda.

JChdagi Rossiya termasining siri nimada?

- Cherchesov finalga etib borishimizga oxirigacha ishondi. U bilan o'tkazgan har bir kunimizda biz ham bunga ishona boshladik. Guruhdan chiqqanimizda, juda quvondik, ammo murabbiy shunday dedi: «Bu boshlanishi, xolos, oldinga intilishda davom etishimiz kerak». Har qanday raqibni enga olishimizga, murabbiyga ishondik, u esa bizga ishondi. Esimda, Misrga qarshi bahsdagi g'alabadan keyin otam bilan birga tushlik qildik. Avvallari o'yinim qovushmaganini esladik, hozir hammasi boshqacha ekanidan quvondik.

Rossiyaliklardan qaysi biri «Real» darajasiga chiqa oladi?

- Golovin, Axmetov. Ular uddalashadi, faqat imkoniyat berilsa, bas. O'ylashimcha, termamizdagilardan birinchi bo'lib Evropaga yo'l oladiganlar - Zobnin va Fernandes. Romaning qilayotgan ishlarini ko'rib, har qanday chempionatda o'ynab ketishiga ko'zim etadi.

«Real»dan ketgani ayni muddao

- Denis jahon chempionatidagi ishtirokdan rohat oldi. Agar «Real»dan ketmaganida, bunday sharafga muyassar bo'larmidi, noma'lum, - deydi Dmitriy Cherishev. - Stas Cherchesov faqat o'yin amaliyoti ko'proq o'yinchilarni tanlaydi. Denis ham ulardan biri edi, ko'p gol urayotgandi. Shunday ekan, «Qirollik klubi»ni tark etgani uchun mundialda qatnashish imkoniyati tug'ildi, deyish mumkin.