Ispaniya superkubogining barcha futbolchilari ham koronavirusga qarshi vaktsina olmagan: ular Saudiya Arabistoniga kira olmasligi mumkin

Saudiya Arabistonida bo'lib o'tadigan Ispaniya Superkubogi bahslaridan oldin muammo yuzaga kelishi mumkin. Mamlakatga kirish uchun koronavirusga qarshi emlanganlik sertifikati bo'lish kerak (kamida ikkita doza bilan).

10 yanvar kuni «Real», «Barselona», «Atletiko» va «Atletik» Ispaniya Superkubogi yarim final bahslari uchun Ar-Riyodga uchib borishi lozim. Marca’ning xabariga ko'ra, jamoalarning barcha futbolchisi ham koronavirusga qarshi emlanmagan.

Ispaniyada bu borada qat'iy qoidalar yo'q. Futbol o'yinlarida qatnashish uchun La Liga protokoliga amal qilish kerak, xolos. Yuzaga kelgan muammo qanday hal qilinishi hozircha noma'lum.

Ispaniya Superkubogi bahslari ikkinchi marta Saudiya Arabistonida o'tkaziladi. Ilk bor ushbu musobaqa 2020 yilda Osiyo mamlakatida o'tkazilgan edi. Koronavirus tufayli 2021 yilgi Superkubok Andalusiyada bo'lib o'tgan.

Eslatib o'tamiz, Ispaniya Superkubogining yarim final uchrashuvlari 12—13 yanvar kunlari bo'lib o'tadi. «Real» «Barselona» bilan bahs olib borsa, ikkinchi o'yinda «Atletiko» «Atletik» bilan o'zaro hisob-kitob qiladi.