Rasman! Predrag Rogan - «Dinamo» bosh murabbiyi!

2022 yilgi Superliga yangi mavsumi oldidan «Dinamo» jamoasi murabbiylar shtabida o'zgarish yuz berdi.

Samarqand viloyati hokimi, viloyat futbol assotsiatsiyasi prezidenti Erkinjon Turdimov hamda klub bosh homiysi «Agromir Buildings» taklifiga ko'ra, «Dinamo» PFK jamoasi bosh murabbiyligiga xorijlik mutaxassis taklif etildi. Serbiyalik Predrag Rogan «Dinamo» klubi bosh murabbiyi etib tayinlandi. 47 yoshli mutaxassis bilan bir yillik shartnoma imzolandi. Serbiyalik murabbiy tez orada klub mashg'ulotlariga kelib qo'shiladi.

Shuningdek, yugoslaviyalik sobiq futbolchi, so'nggi yillarda Serbiya yoshlar jamoasida (U-19) murabbiy sifatida faoliyat yuritgan Ivan Yevich «Dinamo» klubida Predrag Roganga yordamchi murabbiy sifatida ish boshladi. 46 yoshli mutaxassis jamoa mashg'ulotlarida qatnashmoqda.

Ma'lumot uchun, Predrag Rogan 1974 yilning 2 avgust kuni Serbiyada tug'ilgan. UEFAning «Pro» litsenziyasiga ega mutaxassis 2011 yildan buyon murabbiylik faoliyatini yuritib kelmoqda. Xususan, u Serbiyaning «Rad» (2011 yil), «FK Palich» (2013), «Zemun» (2014), «Machva» (2015), «Bachka Topola» (2018), «Spartak Subotnitsa» (2018), «Napredak» (2019), «Uypesht» (Vengriya, 2020) jamoalarini boshqargan. So'nggi 2021 yilda esa Serbiya Superligasi vakili «Vojvodats» klubini boshqargan.

Eslatib o'tamiz, «Dinamo» klubi 5 yanvardan buyon Samarqandda yangi mavsumga tayyorgarlikni olib bormoqda. Jamoa bir qator futbolchilar bilan muzokara o'tkazmoqda. Shartnoma imzolangach, bu borada rasman ma'lum qilinadi.