“L’Equipe” nashri Xolandni sotib olmoqchi bo'lgan klub qancha sarflashi kerakligini hisoblab chiqdi

“L’Equipe” nashri “Borussiya” hujumchisi Erling Xoland yangi jamoasiga qanchaga tushishi mumkinligini hisoblab chiqdi. Frantsuzlarning hisob-kitoblariga qaraganda, xaridor klub forvard uchun taxminan 300 million evro to'lashi kerak bo'ladi.

Bu summa norvegiyalikning tovon puli (75 million evro), agent Mino Rayola va Erlingning otasiga to'lanadigan komissiya (20 million evro), shuningdek, hujumchining keyingi 6 yildagi maoshidan iborat. Jurnalistlarning fikricha, Xolandning yillik maoshi 30-35 million evroni tashkil qiladi.

Qayd etilishicha, “Borussiya” rahbarlari Xoland atrofidagilarga ultimatum qo'ygan: Erling kelajagi haqida shu yilning fevraligacha qaror qilishi kerak. Agar futbolchi Dortmundda qolishga qaror qilsa, “Borussiya” uni jamoaning eng ko'p maosh oluvchi futbolchisiga aylantirishga tayyor, uning yangi shartnomasi yillik maoshi soliqlar to'lanmagan holda 16 million evroni tashkil qilishi mumkin. Hozirda Dortmundda eng ko'p maoshni klub afsonasi Mark Roysni oladi - 12 million evro.