O'zPFL bosh direktori va uning yordamchisi «Metallurg»ning qarorgohiga bordi

Kecha O'zPFL bosh direktori va uning yordamchisi “Metallurg” klubi qarorgohiga bordi

Ular birinchi navbatda “O'zmetkombinat” AJ bosh direktori (klub prezidenti) bilan uchrashuvda ishtirok etgan.

Olingan ma'lumotga ko'ra, kombinat stadion, baza hamda klub akademiyasi uchun ajratilgan er maydonini “Metallurg” futbol klubi balansiga o'tkazib bergan. Demak, o'z stadioniga ega bo'lgan klublarimiz soni yana bittaga ko'paygan (ma'lumotni yaxshilab tekshirib olish kerak).

PFL 2019 yilgi mavsumdan boshlab Superliga klublaridan akademiya masalasini jiddiy talab qildi. Yakunda “Paxtakor”, “Metallurg”, AGMK va “Buxoro” futbol klublari akademiyalar uchun 1,25 milliard so'm o'tkazib berish bo'yicha kelishuvga erishdi. Mazkur klublar shu yil ham o'z akademiyasini ishga tushirmasa, 2020 yilda bu summa ikki barobar ko'payib, 2,5 milliard so'mni tashkil qiladi (undan ko'ra o'z akademiyasiga ega bo'lgani ming marta yaxshi).

“Metallurg” tomoni masalani yaxshi tushunib turibdi. Va nihoyat shuncha yil o'tib, kombinat futbol akademiyasi uchun er masalasini hal qilgan. Shu yil qurilish ishlarini to'la yakunlash rejaga kiritilgan. Ya'ni, 2020 yilga qadar “Metallurg” ham o'z futbol akademiyasiga ega bo'ladi. Stadion maysasi o'tgan mavsumdagidan ancha yaxshilangan, projektor muammolari hal etilgan.

“O'zmetkombinat”da 13 mingga yaqin ishchi bor. Ularning bo'sh vaqtlarini mazmunli o'tkazish maqsadida stadionga jalb qilish ham mumkin. Bosh direktorlar bu masalani ham o'zaro gaplashib olgan. “Metallurg” futbol klubi tomonidan 2019 yilgi mavsum uchun amalga oshirilgan ishlar bilan PFL rasmiy kanali orqali batafsilroq tanishish mumkin.

Diyor Imomxo'jaev