«MYu» Sulsher uchun «Molde»ga to'laydigan kompensatsiya puli aniq bo'ldi

"Manchester Yunayted" klubi bugun Ule Gunnar Sulsherni bosh murabbiy vazifasini bajaruvchi etib tayinladi.

Sulsherning "Molde" bilan tuzgan shartnomasida shunday band bor ediki, unga ko'ra, "MYu"dan taklif tushsa, jamoa norvegiyalik mutaxassisni ingliz jamoasiga qo'yib yuborishga qarshilik ko'rsata olmaydi.

Ule Gunnar Sulsher "MYu" boshqaruvida 2019 yilning 12 mayigacha (APLning so'nggi o'yini) ishlaydi. Bu davr mobaynida "qizil iblislar" murabbiy uchun Molde shahri klubiga 1,8 million funt (taxminan 2 million evro) kompensatsiya mablag'ini to'laydi. Agar 45 yoshli mutaxassis mavsum so'ngida mankunianliklarning to'laqonli bosh murabbiyiga aylanadigan bo'lsa, u holda "Molde" yana 8 mln funt oladi.

Ma'lumot o'rnida. Sulsher yaqinda "Molde" bilan 2021 yilning yozigacha mo'ljallangan yangi shartnoma imzolagandi. Norvegiya chempionati bahorda start oladi.

Ule Gunnar Sulsher futbolchilik faoliyati davomida "MYu" safida 235ta o'yinda maydonga tushib, 91ta gol urgan. 2008-2010 yillarda esa "MYu" yoshlar jamoasini boshqargan.