«Vlaxovichning agentlari «Arsenal» bilan hattoki gaplashishni xohlashmaydi». Jurnalist futbolchining kelajagini tahlil qildi

Italiyalik jurnalist Janluka Di Martsio "Fiorentina" hujumchisi Dushan Vlaxovichning kelajagi borasida o'z fikrini bildirib o'tdi.

"Hozir har bir klub o'z safiga Vlaxovichni jalb qilish borasida o'ylashi kerak. Boisi, u aqlbovar qilmas mashina. So'nggi 12 oy ichida u eng ko'p o'sishga erishgan futbolchi. Boz ustiga, u juda iqtidorli.

"Yuventus" u bilan shartnoma imzolashni istaydi, ammo uning agentlari ko'p pul so'rayotgani uchun bu ishni amalga oshirish qiyin bo'ladi. A seriya klublar, xususan, "Yuventus" yozda Dushan uchun kurashishi juda qiyin kechadi.

Vlaxovich yozgacha "Fiorentina"da qolmoqchi. U "Fiorentina"ni evrokuboklarga olib chiqmoqchi. U "Fiorentina"ning Evropa ligasi yoki Chempionlar ligasiga chiqishida yordam bermoqchi. Ammo bu oson ish emas. Vlaxovich jamoani boshni tik ko'targan holda tark etmoqchi. Keyinchalik uni yomonotliq qilishlarini istamaydi.

Ko'p narsa da'vogar klubning qanday loyiha va qancha maosh taklif qilishiga bog'liq. Masalan, uning agentlari "Arsenal" bilan hattoki gaplashishni istashmayapti. "Arsenal" uning keyingi faoliyati uchun etarli darajadagi klub emas. Ular ko'proq "Tottenxem", "Manchester Siti" yoki "Manchester Yunayted" haqida o'ylashmoqda.

Antonio Konte boshqaruvidagi "Tottenxem" — uning uchun to'g'ri tanlov. U Xarri Keynning o'rnini bosishi yoki u bilan birga bir yil to'p tepishi mumkin. Dushan Xarridan ba'zi narsalarni o'rganishi mumkin. Keyn bilan bir yil faoliyat yuritish — to'g'ri qadam bo'lishi kerak.

Gvardiolaning "Siti"si esa taktik nuqtai nazardan Vlaxovich uchun ayni paytdagi to'g'ri qaror bo'lmaydi. O'ylashimcha, u dastlab Antonio Konte qo'l ostida o'ynashi lozim. Ammo "Tottenxem" ushbu transfer uchun kerakli barcha pulni to'laydimi yoki yo'qmi, bilmadim. Ammo Vlaxovich faoliyatining hozirgi bosqichida "Tottenxem" to'g'ri variant bo'lardi", – dedi jurnalist.

Manba: soccernews.ru