Tennis. O'zbekiston Tokio 2020 Olimpiadasiga yana litsenziya qo'lga kirita oladimi?

Xabaringiz bor, shu kunlarda Milliy olimpiya qo'mitasi yurtimizdagi sport federatsiyalari va assotsiatsiyalari bilan birgalikda Tokio 2020 Olimpiadasi uchun ishlab chiqilgan strategik rejani muhokama qilmoqda. Navbatdagi yig'ilish O'zbekiston tennis federatsiyasi mutasaddilari bilan tashkil etildi.

Sizga yaxshi ma'lumki, O'zbekistonning birinchi raketkasi Denis Istomin Indoneziyadagi Osiyo o'yinlarida g'olib bo'lish orqali Tokio mezbonlik qiladigan Olimpiadaga yo'llanma qo'lga kiritib bo'lgan.

Bu borada Denis o'zbekistonlik sportchilar ichida birinchi bo'ldi. Ammo, bu bilan cheklanib qolmaslik zarur. Bugun o'tkazilgan yig'ilishda o'zbekistonlik tennischilarning ayollar o'rtasidagi yakkalik musobaqalarda, shuningdek erkaklar o'rtasidagi juftlik bellashuvlarida litsenziya qo'lga kiritish imkoniyatlari ko'rib chiqildi.

Ushbu rejani amalga oshirish uchun amalga oshirilishi lozim bo'lgan ishlar muhokama qilindi. Ish jarayoni davomida yuzaga keladigan, yosh iqtidorlarning o'zini ko'rsatishi uchun halal berayotgan muammolar o'rtaga tashlandi.

Tizimni o'zgartirish, terma jamoa a'zolari uchun eng yaxshi sharoitlarda o'quv-mashg'ulot yig'inlarini tashkil qilish, tennischilarimiz uchun xorijdan malakali murabbiy olib kelish masalasini ko'rib chiqish bo'yicha tegishli ko'rsatmalar berildi.

O'z navbatida sportchilarimizning mahoratini oshirish, jahon reytingidagi o'rnini mustahkamlash maqsadida O'zbekistonda xalqaro turnirlarni tashkil etish lozimligi qayd etib o'tildi.