Jasur Jaloliddinov «Andijon»da 8 ming dollar maosh olgan, legionerlar esa 5 mingdan...

«Andijon» klubi matbuot xizmati Superliga-2021 yakunlarini sarhisob qilib, yil yakunida quyi ligaga ravona bo'lgan jamoa futbolchilarining maoshi haqida ham ma'lumot bergan.

Qayd etilishicha, «Andijon» safida yarim mavsum to'p surgan Jasur Jaloliddinovning oylik maoshi 8 ming AQSh dollarini tashkil etgan. Jamoa tarkibida to'p surgan legionerlar esa 5 ming AQSh dollari maosh olgan.

«Birinchi davra uchrashuvlari boshlanishi arafasida klub rahbariyatining faqat yuqori o'rinlar uchun kurashilishi haqidagi gaplari, hech qanday cho'pchak emasdi. Qishki yig'inlar davomida barcha sharoitlar muhayyo etilib, tarkibni shakllantirish, kimlarni olib qolish borasidagi ishlarga chetdan hech kim aralashmadi. Toshkentdagi qimmat mehmonxonalarda istiqomat qilindi, maydonlar ijaraga olindi. Munosabatga yarasha javob bo'lishi kutilgandi. O'sha mahaldagi bosh murabbiy Otabek G'ulomxo'jaevning mavsum boshlanishi arafasida mahalliy muxlislarga jamoani tanishtiruv marosimida bildirgan fikrlari hali yoddan chiqmadi. Fikr bildirish uchun so'zga chiqqan bosh murabbiy, «Men uchun barcha gapni jamoamiz a'zolari g'alaba qozongan holda aytishadi», deganda, qarsaklar avj olib ketgandi...

Superligada qolish uchun kurashga tayyor jamoa o'z futbolchilariga bunchalik miqdorda maosh belgilamaydi. Rahbariyatni ishontirib, keyin olib kelishgan ijrochilarni. Moskvaning «Loko»sidan qaytgan, hali futbolda  katta ishlarga qodir bo'lmagan Jasur Jaloliddinovning bir oylik maoshi 8 ming AQSh dollarida belgilansa... Taklif etilgan legionerlar ham 5 ming AQSh dollarda olishgan. Qirg'izistonlik Bernxard surunkali jarohatga moyilligi sababli, shartnoma muddatidan avval bekor qilindi. Yo'qsa, «nogiron» o'yinchiga ham yana bekordan pul to'lashda davom etilardi...», - deya yozgan klub matbuot xizmati sobiq bosh murabbiy va legionerlarni tanqid qilib. 

Eslatib o'tamiz, «Andijon» mavsumni Otabek G'ulomxo'jaev qo'l ostida boshlagan bo'lsa, undan keyin Yorqin Nazarov, Viktor Kumikov singari murabbiylar ham jamoada faoliyat olib borgan va yakunda jamoa 26 o'yindan keyin 19 ochko jamg'argan holda 13-o'rinni egallab Pro ligaga ravona bo'ldi. 

Ma'lumot uchun, Jaloliddinov 1-davra yakunlangach Toshkentning «Lokomotiv» klubiga o'tgandi. Joriy mavsum andijonliklar safida Pavel Zabelin, Vasiliy Sovpel, Vladislav Vasilev, Plamen Dimov, Martin Boake, Edgar Bernxard singari legionerlar to'p surishdi.

Manba: interfutbol.uz