O'zbekiston MTJga qarshi o'ynagan "MYu"ning sobiq futbolchisi murabbiylik faoliyatini boshladi

Angliyaning "Manchester Yunayted" va Janubiy Koreya terma jamoasi sobiq futbolchisi Park Chji Sun "Kuinz Park Reyndjers" klubining 16 yoshgacha bo'lgan jamoasiga bosh murabbiylik qiladigan bo'ldi.

"Faoliyatim davomida murabbiy va futbolchilardan ko'plab narsalarni o'rgandim. Ko'pchilikning fikricha, murabbiylik qilish - futbol o'ynash bilan bir xil deydi. Men murabbiylik faoliyatimni boshlab shuni bildimki, futbolchi va murabbiy bo'lish umuman boshqa-boshqa narsalar ekanyu. Murabbiyning ishi faqat taktika emas, u jamoa ichidagi muloqotni va har bir futbolchiga ta'sir o'tkazish qobiliyatini ham o'z ichiga oladi", – Parkning so'zlaridan iqtibos keltirmoqda "Kuinz Park Reyndjers" rasmiy sayti.

40 yoshli Park Chji Sun "MYu"ni tark etganidan keyin ikki yilni "KPR" safida o'tkazdi. U "mankunianliklar" safida to'rt marta APL chempioni, va 2008 yili EChL g'olibligini qo'lga kiritdi. Shuningdek, 2014 yili PSV tarkibida Niderlandiya chempioni degan nomga sazovor bo'ldi. Aynan 2014 yili Park Chji Sun futbolchisi faoliyatini yakunlaganini e'lon qilgandi.