“Yuventus” endi top-klub emas: Turin klubining qulashiga kim va nima sabab bo'ldi?

Turinning “Yuventus” klubi so'nggi to'rt turda 10 ochko jamg'argan bo'lsa-da, haligacha A seriyada kuchli 4 likdagi jamoalardan ancha ortda qolmoqda (“Inter”, “Milan”, “Atalanta”, “Napoli”). Aslida, bu inqiroz joriy mavsumda emas, ancha oldin, 2018 yilda, yirik biznes-loyiha parchalana boshlagan paytda boshlandi. Bu Krishtianu Ronalduning kelishiga to'g'ri keldi. O'sha shov-shuvli transfer zanjirning birinchi bo'g'ini bo'ldi, shu sababli “Yuve” top-klubga o'xshamay qoldi: endi top yulduzlar ham, natijalar ham yo'q, lekin jamoada moliyaviy muammolar bor. Shu sabab, “Stadion.uz” nashri Turin klubining cho'kib ketishining asosiy sabablari haqida biroz ma'lumot berishga qaror qildi.

Ichki mojarolar va hiylalar

2019 yilda Turin klubi prezidenti Andrea Anelli “Yuventus” futboldagi asosiy brendlardan biri ekanligini aytdi. Biroq, o'tgan yili klubning yutuqlari bilan emas, balki jamoadagi janjalli muhitni yaratgani bilan ajablantirdi. Birinchisi - Superliga. Anelli “Real Madrid” prezidenti Florentino Peres tashabbusini boshqalardan ko'ra ko'proq g'ayrat bilan qo'llab-quvvatlagan funktsionerlardan biriga aylandi. Superliga tashkil etilgani e'lon qilinishi bilanoq, “keksa sinora” muxlislari ko'chalarga banner osib qo'yishdi: “Anelli bizga xiyonat qildi. Anelli jamoaga xiyonat qildi” mazmunidagi bannerlar Turin ko'chalarini ancha payt “bezab” turdi.

Ammo “Yuventus” prezidenti nafaqat muxlislarga, balki Anellining yaqin do'sti va qizining cho'qintirgan otasi bo'lgan UEFA prezidenti Aleksandr Cheferinga ham xiyonat qildi. Anellining nafaqat “Yuve”da, balki umuman futbolda ham asosiy narsa bo'lishga intilishi bilan hazillashdi. Andrea va Cheferin o'rtasidagi munosabatlari buzildi va “Yuventus” Superliganing boshqa asoschi klublari kabi UEFAning eng ashaddiy dushmaniga aylandi. Evroligaga qo'shilish orqali “keksa sinora” o'z qarzlari bilan shug'ullanmoqchi bo'ldi, ammo, aksincha bo'ldi. Klub o'z obro'siga dog' tushirdi.

Ikkinchi mojaro bir necha hafta oldin sodir bo'ldi – “Yuventus” o'z kapitalini o'stirish uchun moliyaviy qing'irliklarga qo'l urganlikda ayblamoqda.

Agar “Yuventus” firibgarlik orqali boshqa jamoalarga nisbatan ustunlikka erishgan bo'lsa, bozor raqobatini nazorat qilish boshqarmasi vaziyatga aralashishi va jazo chorasini qo'llanilishi aytildi. Italiyada Pemont prokuraturasi va Italiya futbol federatsiyasi birgalikda olib boruvchi yirik tergov boshlandi. Tergovchilar “Yuventus” rahbarlarini 400 million evrolik qarzini yashirishni xohlayotganlikda gumon qilmoqda. Agar Turin klubining aybi isbotlansa, u B seriyaga tushirib yuborilishi mumkin.

Sarri, Ronaldu va Allegri

Shuningdek, tizimdagi inqiroz Sarri davrida yuz berdi. Bungacha “Yuventus”ni besh yil davomida jamoada sifatli futbol ko'rsatgan va chempion qilgan Massimiliano Allegri boshqargan. Uning qo'l ostida klubda hammasi yaxshi muvofiqlashtirilgan mexanizmdek ishlagan. Hatto Ronalduning kelishi ham jamoa muhitini buzmadi. Biroq, Sarri Krishtianuning etakchi bo'lishga bo'lgan haddan tashqari ishtiyoqini jilovlay olmadi. Bosh murabbiy va asosiy yulduz o'rtasida mojaroga olib kelgan urinishlar bo'ldi. Vaziyat talab qilmagan paytlarda Ronaldu o'zboshimchalik bilan mas'uliyatni o'z zimmasiga ola boshladi. Sarri asabiylashdi, buni ko'rgan Anelli murabbiy bilan xayrlashishga qaror qildi.

“Yuventus” prezidenti o'zi chiqarib yuborgan Maks Allegrini qaytishga ko'ndirishdan ko'ra yaxshiroq echim topmadi. Allegri uchun ikkinchi marta jamoa boshqaruviga kelishi, birinchisidan ancha qiyinroq bo'ldi. Ronaldu Manchesterga jo'nab ketdi, ammo uning o'rniga munosib o'rinbosar topilmadi. “Keksa sinora” so'nggi turlarda biroz yaxshiroq o'yin ko'rsatayotganini hisobga olsak ham, “Inter” bilan oradagi farq 12 ochkoni tashkil etadi.

Qorong'u kelajak

Allegri jamoasi pragmatik uslubda harakat qiladi: imkoniyatlar kam, o'tkir paslar kam, bosim kuchsiz. Ronaldu ketganidan keyin tarkibda muhim daqiqada oldinga o'tishga jur'at etadigan boshqa futbolchi yo'q edi. Dibala va Kezadan umid katta edi, lekin birinchisi shunchaki o'zini ortiqcha baholadi, ikkinchisi esa klubning faxriy futbolchilarini boshqarish uchun hali yosh edi. “Yuventus”da ham aqlli va kreativ markaziy yarimhimoyachi etishmayapti. Ilgari bu joyda Pyanich o'ynardi, ammo hozir hech kim o'z vazifalarini to'liq bajara olmaydi. Umuman olganda, “Yuventus”ning tarkibi Evropaning top-klubi deb atash uchun ancha zaif. Har bir chiziq kuchli o'yinchilarga muhtoj, ammo kuchaytirish uchun moliyaviy holat yaxshi emas. Voytsex Shesni darvozada ko'p xatolarga yo'l qo'yadi, Matteys de Ligtga kuchliroq sherik yo'q, yarimhimoya chizig'i qanotlari uncha yaxshi o'yin ko'rsatmayapti. Hujumchi Alvaro Morata esa gol urishni unutib qo'ygan. “Yuventus” endi o'zining moliyaviy firibgarliklari tufayli sud jarayoniga ko'proq e'tibor qaratganini inobatga olsak, Allegri qishki transferlarga umid qilmasligi mumkin.

Jamshidjon Mahmudov tayyorladi.