«Tottenhem» - «Liverpul» o'yinida hakamning bahsli qarorlari xususida

«Tottenhem» - «Liverpul» o'yini «yondi». Olti o'yin qoldirilgan turda olti o'yinga etarli voqealar bo'ldi. Tabiiyki, bahsli hakam qarorlari ham.

Internetda Robertsonning qizil kartochkasi va shu rangdagisi Keynga berilmagani mavzu bo'lib turibdi. Aksariyat fikrlar bo'yicha, har ikki holat ham qizil, ammo hakam Keynni ayadi, qarorlarida uzviylik bo'lmadi, deb hisoblashmoqda.

Menimcha, aynan uzviylik tomonidan hakamda muammo yo'q va shu rakursdan har ikki qarorni tushunish mumkin.

Hakam imkon qadar liberal boshqardi. Kichik holatlarda maydalashib o'tirmadi. Gol vaziyatda Salohning qo'liga to'p tekkani, Jota va Alliga nisbatan jarima maydonidagi harakatlarga e'tibor berilmadi. Keynning holati xuddi mana shu boshqaruv uslubiga mos keladi.

Quyida ikki rasm turibdi. 1-rasmga qarab turib, darhol aytish mumkin - qizil. Ammo o'yin paytida Keyn harakatlarida agressiya yo'q edi, to'p uchun o'ynaldi va yutqazilganini bilib, hujumchi sekinlashdi, kontakt qattiq bo'lmadi. Qog'ozda "qizil"ga tortsa-da, hakam e'tiborga olishi mumkin bo'lgan omillar bor edi.

Ishonmasangiz, ikkinchi rasmga qarang. Rasmda - Mane qoida buzyapti to'g'rimi? Agar shu vaziyatda "Liverpul" gol urganini e'tiborga olsak, hakam hisoblamasligi kerak, to'g'rimi? Ammo bu erdayam, Keynning foydasiga ishlagan omillar bor - Maneda agressiya yo'q, to'p yo'qotilganini bilgach, sekinladi, kontakt bor, ammo zararsiz. Albatta, Keyn bilan ayni emas, ammo Keynga sariq va jarima, Maneda hatto qoida buzilishi qayd etilmadi. Ya'ni ikkoviyam bir xil yo'nalishdagi, vaziyat kayfiyatiga monand qaror.

Robertsonning qizili yuqoridagi sanalgan holatlardan butunlay farq qiladi - u erda agressiya bor edi. Oqlab bo'lmaydi. Hakamni qarorlarda uzviy emaslikda ayblab ham.

To'g'ri, agar hakam yanada qattiqqo'l, ya'ni boshqacha uslubda boshqarganda, Keyn maydondan chetlatilar va umuman «Liverpul» foydasiga stsenariy bo'lishi ehtimoli katta edi.

Ammo shu tufayli hakamni boshqacha emaslikda, tabiiyki, xatolarda ham ayblay olmaymiz.

Qahramon Aslanov.