«MYu» murabbiylar shtabining yana bir a'zosiga chiqish eshiklarini ko'rsatdi

«Manchester Yunayted»ning murabbiylar shtabidagi katta vakili Kiran Makkenna klubni tark etdi. U «Ipswich Town»ga yangi bosh murabbiy etib tayinlandi.

35 yoshli Makkenna birinchi liga klubi bilan 3 yillik shartnomaga imzo chekdi. Endi shanba kuni uning jamoasi o'z maydonida «Sanderlend»ga qarshi bahs olib boradi. Makkenna «Yunayted»ga U- 18 jamoasi murabbiyi sifatida qo'shilib, keyinchalik Joze Mourinoning murabbiylar shtabiga jalb qilingan edi. U Ole-Gunnar Sulsherning murabbiylar jamoasida ham muhim rol o'ynagan. Shunga qaramay, «Yunayted» unga chiqish eshiklarini ko'rsatishga qaror qildi. Irlandiyalik mutaxassis esa o'zini bosh murabbiy sifatida sinab ko'radi.

Kiran Makkenna ushbu hodisaga shunday izoh beradi: «So'nggi besh yil davomida «Manchester Yunayted»da ishlash men uchun sharaf. 2016 yilda U-18 terma jamoasiga murabbiy sifatida kelganimda men dunyoning eng yaxshi klubida ishlayotganimni his qilganman. U erda bolalar uchun ajoyib sharoit yaratilgan edi va anchayin iqtidorli o'yinchilarni tayyorlash imkoniyatiga ega bo'ldim.

Men har doim Mourino va Sulsherdan buning uchun minnatdorman. O'tgan to'rt yil ichida men ulardan juda ko'p narsalarni o'rgandim va bunday fidoyi murabbiylar guruhi bilan ishlash men uchun zavq bag'ishlaydi. Shuningdek, Ralf Rangnikka ham minnatdorchilik bildirmoqchiman, u bilan ishlagan qisqa vaqtim menga manzur keldi va u ko'rsatgan unsurlarni kelgusi faoliyatimda ham qo'llashga harakat qilaman.

«Murabbiylik sohasidagi turli lavozimlar davomida mening asosiy maqsadim doimo bosh murabbiy bo'lish edi va bu endi ushalish arafasida. Ajoyib tarixga ega klub - «Ipswich Town»da murabbiy bo'lish uchun zo'r imkoniyatga ega bo'lgan edim. Undan foydalandim. Men yillar davomida birga ishlagan xodimlar va futbolchilarga minnatdorchilik bildirmoqchiman va albatta Ralfga omad tilayman», - deydi Makkenna.

«MYu» sport direktori Jon Murto jamoaning murabbiylar shtabidagi sobiq xodimi haqida shunday deydi: «Kiran juda ham iste'dodli murabbiy, u klub uchun foydali futbolchilarni etishtirishda muhim rol o'ynadi. 18 yoshgacha bo'lgan terma jamoa tarkibida ko'plab yoshlarning rivojlanishida Makkennaning hissasi katta. U yillar o'tib asosiy jamoaning murabbiylar shtabidagi muhim a'zosiga aylandi, bu erda uning o'yinga bo'lgan o'tkir yondashuvi va chuqur mehnati yuqori baholanadi. Endi u bosh murabbiy sifatida o'z yo'lini davom ettirish imkoniyatiga ega va «Manchester Yunayted»da hamma unga omad tilaydi», - deydi Murto.