Ravshan Ermatov O'zbekiston U23 terma jamoasi bilan uchrashdi

Xabaringiz bor, O'zbekiston Olimpiya terma jamoasini 2022 yilda ikkita yirik musobaqa — mamlakatimiz maydonlarida bo'lib o'tadigan U23 Osiyo kubogi va Xanchoudagi Osiyo o'yinlari kutib turibdi.

Futbolchilarimiz qisqa muddatli ta'tildan qaytganlaridan so'ng ushbu turnirlarga tayyorgarlik boshlandi. Avval xabar berganimizdek, Olimpiyachilarimiz Toshkent va Antaliya shaharlarida o'quv-mashg'ulot yig'inlari o'tkazishmoqda. Ertadan jamoa tayyorgarlikni Antaliyada davom ettiradi. Safar oldidan O'FA birinchi-vitse prezidenti Ravshan Ermatov jamoa bilan uchrashdi.

Murabbiylar shtabi tomonidan jamoaning tayyorgarlik jarayoni haqida to'liq ma'lumot berildi. Ravshan Ermatov futbolchilar bilan suhbatda bo'lajak turnirlar ahamiyati, ularga tizimli va sifatli tayyorgarlik ko'rish, yurtimiz sharafini munosib himoya qilish zarurligi va doimiy ravishda mehnat qilib, o'z darajasini oshirib borish muhimligi haqida gapirib o'tdi. Tayyorgarlik jarayonida barcha detallarga e'tibor qaratish borasida ko'rsatmalar berdi. O'z navbatida O'FA tomonidan bu borada barcha sharoitlar taqdim etilishi e'tirof etildi.