Og'ir atletika. Barcha «oltin»lar Akbar Jo'raevniki bo'ldi

Toshkentda og'ir atletika bo'yicha jahon chempionatida bugun 109 kg. vazngacha bo'lgan erkaklar bahslarda ishtirok etishdi. Biroz avval dast ko'tarish mashqlarida Akbar Jo'raev oltin medalni qo'lga kiritgani haqida xabar berib o'tgandik.

Hozirgina siltab ko'tarish mashqlari ham yakunlandi. "A" guruhida 11 nafar ro'yxatga olingan bo'lib, ulardan 8 nafari, dast ko'tarishda bo'lgani kabi, o'z ishtiroklarini erta yakunlashdi. Shundan so'ng g'oliblikka da'vogarlar — Ruslan Nurudinov, Akbar Jo'raev va armanistonlik Simon Martirosyan bahslarga kirishishdi.

Dastlab Akbar Jo'raev 226 kg. vaznga buyurtma berdi va uni o'ziga osonlik bilan bo'ysundirdi. Nurudinov esa o'z ishtirokini 227 kg. bilan boshladi va toshni muammosiz ko'tardi. Armanistonlik Simon esa ilk urinishda 228 kg. muvaffaqiyatli ko'tardi.

Ikkinchi urinishlarini Jo'raev boshlab berdi va u 232 kg.ni ko'tara oldi. Shundan so'ng Ruslan va Martirosyan buyurtmalari orasida taktik kurash boshlandi. Natijada hamyurtimiz 236 kg.ga yaqinlashdi va uni boshi uzra baland ko'tardi. Arman polvoni 237 kg.ga buyurtma berib, o'zining so'nggi ikki urinishida ko'tara olmadi.

Natijada so'nggi urinishlar oldidan har ikki vatandoshimiz ikki kurash yakuni bo'yicha siltab ko'tarishda armanistonlik sportchini ortda qoldirib ulgurishdi. Jo'raev 238 kg.ga buyurtma berib, o'zining shaxsiy rekordini yangilamoqchi bo'ldi hamda bu ishni muvaffaqiyatli uddaladi.

Nurudinov oldida ikkita yo'l bor edi: yo siltab ko'tarishda oltin medalni qo'lga kiritish (239 kg. bilan) yoki o'ziga tegishli jahon rekordini yangilashga urinish. Ruslan ikkinchi variantni tanladi va 242 kg.ga buyurtma berdi. Ammo unga biroz omad etishmadi.

Natijada Akbar Jo'raev JChda 3ta oltin medalni qo'lga kiritgan bo'lsa, Nuridinov "dast"dagi bronzadan so'ng o'z hisobiga 2ta "kumush" yozib qo'ydi. Martirosyan esa "kumush+bronza+bronza" bilan o'z yurtiga qaytadigan bo'ldi.

Og'ir atletika bo'yicha JCh.
Erkaklar, 109 kg.
1. Akbar Jo'raev — 195 kg. + 238 kg. = 433 kg.
2. Ruslan Nurudinov — 185 kg. + 236 kg. = 421 kg.
3. Simon Martirosyan   — 188 kg. + 228 kg. = 416 kg.