Og'ir atletika. Akbar Jo'raev dast ko'tarishda oltin medalni qo'lga kiritdi

Toshkentda og'ir atletika bo'yicha jahon chempionatida bugun 109 kg. vazngacha bo'lgan erkaklar ishtirok etishyapti. Hozirgina dast ko'tarish mashqlari yakunlandi.

"A" guruhida 11 nafar ro'yxatga olingan bo'lib, ulardan 8 nafari ishtiroklarini erta yakunlashdi. Ular orasida eng yaxshi natija 179 kg. bo'ldi. Shundan so'ng g'oliblikka da'vogarlar — Ruslan Nurudinov, Akbar Jo'raev va armanistonlik Simon Martirosyan bahslarga kirishishdi.

Dastlab Ruslan 185 kg. tosh uchun buyurtma berdi. Ammo uning birinchi urinishi muvaffaqiyatsiz chiqdi. Hamyurtimiz ikkinchi urinishda bu vaznni o'ziga bo'ysundirdi.

Shundan so'ng Akbar Jo'raev 187 kg. toshni ilk urinishda boshi uzra baland ko'targan bo'lsa, Martirosyan 188 kg.ni o'ziga bo'ysundirdi. Nurudinov esa uchinchi urinishda 189 kg.ni ko'tardiyu, ammo hakamlarning ikki nafari urinishni muvaffaqiyatsiz deya hisobladi. Murabbiylarimiz tomonidan berilgan "chellenj" ham naf bermadi.

Akbar ikkinchi urinishda 192 kg.ni ham muvaffaqiyatli ko'tardi va peshqadamga aylandi. Arman sportchisi 193 kg.ga buyutma berdi va uni ko'tardi. Ammo hakamlar uning urinishiga "qizil" tugmachani bosishdi. U ham "chellenj" berdi, ammo muvaffaqiyatga erishmadi.

Akbar Jo'raev uchinchi urinishga 195 kg. buyurtma berib, uni qiyinchilik bilan bo'lsa-da o'ziga bo'ysundirdi. Simon 196 kg. uchun so'nggi urinishga chiqib, uni ko'tara olmadi.

Shu tariqa, Jo'raev dast ko'tarishda oltin (195 kg.), Martirosyan kumush (188 kg.) va Nurudinov bronza (185 kg.) medallariga ega bo'ldi.

Akbar ikki kurash bo'yicha Martirosyandan 7 kilo oldinga o'tib oldi. Hozirda sportchilar siltab ko'tarish mashqlarida ishtirok etishyapti.