Qahramon Aslanov maqolasi: «Manchester Siti» nima uchun «Lids»ni o'ta yirik hisobda mag'lub etdi?

“Manchester Siti”ning “Lids” ustidan o'ta yirik hisobdagi (7:0) g'alabasi kuchlar muvozanati nuqtai nazaridan anormal ko'rinishi mumkin bir qaraganda, aslida esa, unday emas. Anormallik boshqa joyda. Gvardiola jamoasi har doimgidan boshqacha o'yin ko'rsatmadi, “Lids” “Siti”ning avvalgi raqiblaridan ko'ra kuchsizroq emasdi.

Bu erda normal bo'lmagan narsa boshqa – “Manchester Siti”ning vaziyatlardan foydalana olgani. Shu xolos. Aslida “Siti” deyarli har o'yinda mana shuncha miqdorda xavfli vaziyat yaratadi, ammo bu safargi yirik hisobning sababi, bu safar o'sha vaziyatlar kutilganidan ko'proq golga aylandi.

XG degan ko'rsatkich bor – darvozaga berilgan zarbalarning xavflilik darajasi koeffitsentda aks ettirilib, to'planib boriladi. Aytaylik, uzoqroqdan zarba berilsa, ushbu zarbaning XG ko'rsatkichi 0.12 bo'lishi mumkin. Ochiq darvozaga, yaqinroqdan ijro etilgan zarba XG da 0,90, ya'ni deyarli 1 ga yaqin baholanishi mumkin va hokazo.

Xullas, “Manchester Siti” “Lids”ga qarshi o'yinda XG bo'yicha 2.3 ochko to'plagan. Gollar soni esa 7. Ya'ni urilgan gollar soni XG orasidagi farq 4.7 ni tashkil qilmoqda. Bu vaziyatlardan foydalanishda o'ta yuqori ko'rsatkichni anglatadi. Bu darajadagi farq masalan, oxirgi marta besh yil oldin APL da kuzatilgan ekan.

“Manchester Siti” ushbu mavsumda avvalgi 16 o'yinning 8 tasida, ya'ni teng yarmida XG bo'yicha kechagi o'yindan kattaroq ko'rsatkich qayd etgan. Hatto o'tgan turdagi “Vulverhempton” (1:0), ikki hafta oldingi “Vest Hem” (2:1), mavsum boshidagi “Lester”ga (1:0) o'yinlarda “shaharliklar” kechagi o'yindan ko'ra ko'proq XG qayd etishgan, ya'ni ko'proq xavfli vaziyat yarata olishgan.

Agar foiz hisobida “Lids” bilan o'yin XG si va “Uotford” bilan o'yinnikini (3.05) solishtirsak, “Siti” agar vaziyatlardan kechagidek foydalanganda, “Uotford” darvozasiga 9 ta gol urishi kerak edi. "Brayton"ni 10:1, “Arsenal”ni esa, 12:0 hisobida mag'lubiyatga uchratishi lozim bo'lardi.

Qahramon Aslanov.