«Manchester Yunayted»ni boshqarishi mumkin bo'lgan 4 murabbiy

«Qizil iblislar»ni «benazir» tark etgach, vaqtinchalik Maykl Kerrik postni egalladi. Lekin katta ehtimol bilan mavsum tugagach, yangi bosh murabbiy tayinlanadi. Sababi o'zi shundoq ham tushib ketayotgan imidjni bu yanayam tushirib yuborsa, ajab emas. Shu sababdan, keling, «Yunayted» uchun eng maqbul va haqiqatga yaqin variantlarni ko'rib chiqamiz.

Ole-Gunnar Sulsher

«Yunayted» tarbiyalanuvchisi va «sehrli tayoqcha»si yana yordamga kelishga shay. Sayyoramizda «qizil iblislar»ni boshqarishni xohlamagan murabbiy bo'lmasa kerak. Bu jamoaning o'ziga tortib turadigan nimasidir bordek, go'yo. Ole-Gunnarga to'xtalsak. Murabbiy yosh, hujumkorlikni yoqtiradigan futbol taklif qilishi aniq. U Fergi bobo qo'l ostida futbolning sir-asrorlarini yaxshi o'rgangan. Bularni esa amalda qo'llasa bormi?! Norvegiyalik mutaxassisda kichik bo'lsa ham imkon bor.

Loran Blan

Mana bu qiziq variant to'g'rimi? Blanni ko'pchilik «PSJ»dagi davrlarni yaxshi eslasa kerak. Aslida, uni «Bordo» jamosidagi ishlari murabbiy sifatida mashhur qilgan. Blanga ham «Old Trafford» begona emas. U amerikalik klub egalarining short-listida turgan 3 nafar murabbiylardan biri. Agar Blan keladigan bo'lsa, «Manchester Yunayted» barqaror o'yin ko'rsatishi kutiladi. Chunki Loran Blan tartib va intizomni qattiq talab qiladigan murabbiylar sirasiga kiradi.

Zayniddin Zidan

Evrokuboklarni sog'ingan «qizillar»ning muxlislari uning kelishini xohlashmoqda. Albatta-da! Naqd 3 marotaba ketma-ket kubokni yutgan murabbiyni kim ham jamoasida ko'rishni istamaydi deysiz? Zizu haqiqiy hujumkor futbol tarafdori. Uning qo'lostida «Real» Evropani to'la zabt etgan edi. U agar «Manchester Yunayted» postiga kelsa, APL shiddati yanada osharmidi. Axir APLdagi yulduzlar soni yana bittaga ko'payardida.

Maurisio Pochettino

«Shporlar» uni qo'yib yuborishni xayollariga ham keltirmayapti. Albatta, axir birorta katta transferlarsiz ham jamoa statusini yuqori tempda ushlab turgan murabbiyni kim ham qo'yib yuborardi. «Manchester Yunayted»ning amerakalik xo'jayinlari esa u uchun hatto 34 million evro kompensatsiya pulini to'lashga ham tayyor turishibdi. Pochettinoda Mourga o'xshab transferlar uchun 400 million pul bo'lgandami?! Aniq aytish mushkulku, lekin Pochettino zamonaviy futbolni targ'ib qiladigan murabbiy, uning o'yini Mourning «Manchester»inikidan qiziqroq va tomoshaboproq ko'rinmoqda. Tan olish kerak, «Benazir»ninig ketishiga ham noto'g'ri amalga oshirilgan transferlar asosiy omil vazifasini o'tab berdi.

Yahyoxo'ja Ulug'xo'jaev