Bosh maqsad – “Navbahor”ning shonli davrlarini qaytarish!

O'zbekistonning eng nomdor va nufuzli jamoalaridan biri hisoblangan “Navbahor” 2022 yil uchun vazifalarni belgilab olgani holda, yangi mavsumga qizg'in tayyorgarlik ko'rmoqda.

Namangan viloyati hokimi, viloyat futbol assotsiatsiyasi prezidenti Shavkat Shokirjanovich Abdurazzaqovning tashabbusi bilan kelgusida amalga oshirilishi lozim bo'lgan maqsad-vazifalar belgilandi. Unga ko'ra, “Navbahor” PFK rahbariyati hamda jamoaning yangi bosh murabbiyi, mamlakatimizdagi eng sovrindor va tajribali mutaxassislardan biri Samvel Babayan hamkorligida “Navbahor”ning shonli davrlaridagi muvaffaqiyatli an'analarini tiklash, “Navbahor” brendini qayta jonlantirish, akademiyadan to asosiy jamoagacha bo'lgan vertikal tizimni shakllantirish, akademiyadagi futbolchilarni klub va uning an'analarini hurmat qiladigan darajada yuksak professionalizm va vatanparvarlik ruhida tarbiyalash eng ustuvor vazifa sifatida belgilandi. “Navbahor” PFK ushbu ezgu maqsadlarni ro'yobga chiqarish, jamoamiz tarkibini yanada kuchaytirish niyatida katta transferlarni amalga oshirmoqda, yana bir qator mahoratli futbolchilar bilan muzokaralar davom etmoqda.

Bir so'z bilan aytganda, “Navbahor” PFK Namangan viloyati hokimi rahnamoligida hozirning o'zida viloyatimizda futbolni rivojlantirishning yangicha hisobotini yuritishni boshlab ulgurdi. Ishonchimiz komilki, bu sa'y-harakatlar, qilinayotgan mehnatlar samarasi yaqin kelajakda “Navbahor”ning ulkan yutuqlari hamda muvafffaqiyatlari misolida yaqqol namoyon bo'ladi va mamlakatimizda millionlar sevib tomosha qiladigan futbol rivojiga o'zining katta hissasini qo'shadi.

“Navbahor” PFK matbuot xizmati.