Diyor Imomxo'jaev: "2021 yilgi mavsum ikki yo'nalishda saviyani oshirishni rejalashtirgandik"

O'zPFL bosh direktori Diyor Imomxo'jaev ortda qolgan mavsumni sarhisob qildi.

"2021 yilgi mavsum ikki yo'nalishda saviyani oshirishni rejalashtirgandik

– litsenziyalash
– musobaqalar sifati.

Bugunga kelib 12 ta klubimiz OFK litsenziyasini qo'lga kiritdi va bu borada Yaponiya hamda Janubiy Koreyadan keyin Osiyoda uchinchi bo'ldik. Bu bilan biz potentsialimiz bor ekani, to'g'ri mexanizm bilangina muvaffaqiyatga erishishimiz mumkinligini isbotladik. Hatto Pro liga klublarini shu darajaga yaqinlashtirdik, talablarni jiddiyroq qo'ydik.

4 dekabr kuni esa yildagi so'nggi rasmiy o'yinimizni o'tkazdik. Bu yil biz musobaqalarni Reglamentga qat'iy amal qilgan holda avvalgilaridan yaxshiroq o'tkazishga erishdik. Chempionatda intriga so'nggi turga qadar saqlanib turdi, kubok esa chorak finaldan boshlab haqiqiy jang maydoniga aylandi. Hatto o'smirlar va yoshlar uchun atalgan U-14, U-16, U-18 musobaqalariga ham qator ijobiy o'zgarishlar kirita oldik.

Ortda qolgan mavsum uchun barcha futbolchilar, murabbiylar, klublar, futbolimiz muxlislari va OAV vakillariga chuqur minnatdorchilik bildiramiz. Bizga ishonganlar ishonchini oqlashda davom etishga harakat qilamiz. Ulgurilmagan muammolarga vaqti bilan echim topib borishimizga ishonamiz", - deya xabar qoldirdi Imomxo'jaev o'z Telegram sahifasida.