«Jizzakh women‘s Cup-2019». O'zbekiston ayollar OTJ bugun hal qiluvchi o'yinda Qozog'iston jamoasiga qarshi bahs olib boradi

Shu kunlarda Jizzaxda ayollar o'rtasida «Jizzakh women Cup-2019» musobaqasi bo'lib o'tayotganidan xabaringiz bor. O'zbekiston ayollar OTJ shu kungacha "So'g'diyona-W", Qirg'iziston U-21, "AGMK-W" jamoalariga qarshi maydonga tushib, barcha o'yinda g'alaba qozondi. 

Raqiblar darvozasiga 15ta gol kiritib, o'z darvozasidan bor-yo'g'i 1ta to'p o'tkazib yubordi. Bugun Bahrom Norsafarov shogirdlari musobaqaning hal qiluvchi bahsida Qozog'istonning "Biik" jamoasiga qarshi maydonga tushadi. Uchrashuv soat 16:00da Jizzaxdagi Markaziy o'yingohda boshlanadi. 

"Biik" jamoasi ham hozirchaga o'tkazilgan barcha o'yinda g'alaba qozonib, raqiblar darvozasiga 22ta gol kiritgan va o'z darvozasidan 2ta to'p o'tkazib yuborgan. Bugungi o'yinda faqat g'alaba O'zbekiston ayollar olimpiya terma jamoasini musobaqa g'olibiga aylantiradi. Durang natija Qozog'iston jamoasi foydasiga ishlaydi. Futbolchi qizlarimizga bugungi o'yinda omad yor bo'lishini tilab qolamiz!