Lyubinko Drulovich: «O'zbekiston terma jamoasini qo'llab-quvvatlash uchun barcha muxlislarni stadionga chorlab qolaman»
/ Kiritdi: BestMaster Ko'rilgan: 557
Xabaringiz bor, shu yilning 22-26 mart kunlari Toshkentda U-23 Osiyo chempionati saralashining «F» guruhidan o'rin olgan uchrashuvlar bo'lib o'tadi. Mazkur saralash bahslarida O'zbekiston olimpiya terma jamoasi bilan birgalikda Tojikiston va Hindiston terma jamoalari ham ishtirok etishadi.
Bugun ana shu saralash o'yinlari oldidan uchta terma jamoa bosh murabbiylari ishtirokida matbuot anjumani bo'lib o'tdi.
Lyubinko Drulovich (O'zbekiston OTJ bosh murabbiyi): “Ertaga muhim musobaqada ishtirokni boshlaymiz. Bu saralash bahslari oldidan Ispaniya va Turkiyada yig'in o'tkazdik. Bir qator nazorat o'yinlarida maydonga tushdik. Maqsad bitta – barcha o'yinda g'alaba qozonib, Osiyo chempionati yo'llanmasini qo'lga kiritish. Terma jamoaga jalb qilingan futbolchilardan ko'nglim to'q. Ularning jismoniy holati meni qoniqtirmoqda. Iloji boricha ko'proq gol urib, g'alaba qozonishga harakat qilamiz. Biz mazkur saralash o'yinlarini amaldagi Osiyo chempioni sifatida o'tkazamiz.
Bu o'ziga xos bosim yuklaydi. Umuman, futbolda hamisha bosim bo'ladi. Bu normal holat. Ertaga stadionga ko'proq muxlislar tushib, bizni qo'llab-quvvatlab turishsa, o'ylaymanki, bosimni engishimiz osonroq bo'ladi. Pokiston terma jamoasi mazkur saralashga kela olmaganidan afsusdaman. Pokiston ham qatnashganda, futbol uchun yaxshi bo'lardi. Ko'proq o'yin o'tkazardik. Tarkibda kichik jarohat olgan futbolchilar bor. Bobur Abduxoliqov va Abror Ismoilov o'zini bir oz yomon his qilayotgandi. Hindistonga qarshi o'yin oldidan mashg'ulot o'tkazamiz. O'sha mashg'ulotdan keyin ertaga asosiy tarkibda maydonga tushadigan futbolchilar haqida bir to'xtamga kelib olamiz”.
Derrik Pereyra (Hindiston OTJ bosh murabbiyi): “Toshkentda bo'lib o'tadigan saralash bahslari oldidan Qatarda yig'in o'tkazdik. Qatar terma jamoasi bilan nazorat o'yinida maydonga tushdik. Tayyorgarlik uchun ko'p vaqt bo'lmadi. Shunga qaramay, Osiyo chempionati yo'llanmasini qo'lga kiritish uchun bor kuchimiz bilan harakat qilamiz. Tarkibimizda ko'plab yosh futbolchilar bor. Ularga ishonch bildirib, maydonga tushirmoqchimiz. Saralashdagi raqiblarni videoyozuvlar orqali o'rganib chiqdik. O'zbekiston musobaqaning amaldagi chempioni. Tojikiston ham ancha shakllangan terma jamoa. Shu sababli ularga qarshi o'yinlar oson bo'lmasligi aniq.
Pokiston terma jamoasi kelganida bitta o'yin ko'proq o'tkazardik. Endilikda Osiyo chempionati yo'llanmasi uchun kurash faqat ikkita o'yinda kechadi. Biz musobaqani ijobiy natija bilan yakunlamoqchimiz”.
Usmon Toshev (Tojikiston OTJ bosh murabbiyi): «Dastavval, barchani Navro'z ayyomi bilan bilan tabriklayman. Saralash bahslariga jiddiy tayyorgarlik ko'rdik. Tarkibimizda yaxshi futbolchilar bor. Umid qilamanki, ijobiy natija qayd eta olamiz. Raqiblar haqida nima deyishim mumkin? O'zbekiston qit'adagi kuchli terma jamoalardan biri. Hindiston ham o'ziga yarasha kuchli jamoa. Pokiston terma jamoasi kelmaganidan afsusdaman. Ular ham ishtirok etsa, ko'proq o'yin o'tkazgan bo'lardik. Nima bo'lishidan qat'iy nazar, maydonda bor kuchimiz bilan harakat qilamiz».