Alisher Odilov: «Pro ligada o'ynab, o'z kuchimizga ishonchimiz ortdi»

«Olimpik» jamoasi Superliga yo'llanmasi uchun o'tish uchrashuvida Muborakning «Mash'al» jamoasidan ustun keldi. Ushbu bahsdan so'ng joriy mavsumda to'purarlik qobiliyatini namoyon qilgan «Olimpik» hujumchisi Alisher Odilov fikrlari bilan o'rtoqlashdi.

"Superliga yo'llanmasini qo'lga kiritdik. Lekin undan ham katta asosiy maqsad – Parij olimpiadasi chiptasiga ega chiqish. Muvaffaqiyatlarimizda murabbiyimiz Timur Kapadzening hissasi katta, deya olaman. Mashg'ulotlarda har tomonlama ishladik.

O'rinbosarlar jamoasida o'ynab yurganimizda o'zimizga nisbatan ishonch ancha kam edi. Pro ligada o'ynabb o'z kuchimizga ishonichimiz ortdi. Qo'limizdan kelishini bildik. Katta futbolda yaxshigina o'sishga erishdik", – deydi Alisher Odilov.