Viktor Jalilov: “Ko'p hujum qilgan jamoa har doim g'alaba qozonavermaydi”

Superliga 26-turidan o'rin olgan “Navbahor” – “Qo'qon-1912” uchrashuvidan keyin mezbonlar bosh murabbiyi Viktor Jalilov o'yin haqidagi fikrlarini bildirib o'tdi.

- Murabbiy sifatida bu o'yin albatta, men uchun juda og'ir o'tdi. Tezkor gol o'tkazib yubordik. Keyinchalik o'yin tizginini qo'lga oldik, gol ham urdik, keyinchalik ko'plab vaziyatlar yaratishimizga qaramay, ulardan foydalana olmadik. Ikkinchi bo'limda esa, kontsentratsiyani yo'qotishimiz oqibatida raqib ikkita to'p kiritdi. Qaerdadir futbolchilardagi charchoq o'z so'zini aytdi, qaerdadir e'tiborsizlik pand berdi. Lekin yigitlar borlarini berishga harakat qilishdi, futbolda shunaqa holatlar ham bo'lib turadi. Vaholanki, ikkinchi bo'limda ham bir nechta imkoniyatlarga ega bo'ldik, ba'zi vaziyatlarda “Qo'qon-1912” darvozaboni yaxshi harakat qilgan bo'lsa, ayrim hollarda gol urish uchun futbolchilarimizga biroz mahorat etishmadi. Umumiy hisobda, hujumlar va zarbalar soni bo'yicha raqibdan ustunlikka erishdik. Ammo futbolda har doim ham ko'p hujum qilgan jamoa g'alaba qozonavermaydi.

-“Navbahor”ning joriy mavsumdagi ishtiroki haqida nima deya olasiz?

- Bilasizmi, agar birinchi davradan kelib chiqib fikr yuritsak, jamoamiz go'yo to'fonga tushib qolgan kemaga o'xshardi. Bir o'yinda g'alaba qozonsak, birida o'z maydonimizda ochko yo'qotdik, keyin esa mehmondagi uchrashuvlarda ochko oldik. Barqarorlik etishmadi. Ikkinchi davrada esa o'yinda muvozanatni tiklashga erishdik, “kema” ham to'g'ri yo'liga tushib, ravon “suzish”da davom etdi. Afsuski, qaysidir pallalarda aynan barqarorlikning etishmasligi pand berdi. Bu yilgi chempionat jamoa uchun yo'qotishli bo'ldi, demagan bo'lardim, mavsumdan negativga qaraganda ko'proq pozitiv oldik. O'yinlarni tahlil qilamiz, qaerda ijobiy jihatlar bor, qaerda kamchiliklar mavjud, shundan kelib chiqib, kelgusi mavsumga tayyorgarlik olib boramiz.

- Ikkinchi bo'limda nega yaxshi o'yin ko'rsatib turgan Ehsoni Panshanbe almashtirildi? O'sha vaziyatda ko'p imkoniyatlardan foydalana olmagan Zabihillo O'rinboevni nega o'yindan olmadingiz?

- Hujumlar va standartlar payti havodagi yakkakurashlarda qatnashishi uchun Zabihilloni maydonda qoldirdik. O'rinboev faollik ko'rsatdi, faqat so'nggi pallada unga omad etishmadi. Uchrashuv oxirida uning ham charchaganini sezgach, o'rniga boshqa futbolchini tushirdik. Panshanbening almashtirilishiga sabab shu.