Ulug'bek Baqoev: «Bu yili «So'g'diyona» va AGMK medallarga «Nasaf»dan ko'proq haqli edi»

O'zbekiston Superligasining 26-turidan o'rin olgan AGMK - «So'g'diyona» 0:1 uchrashuvidan so'ng mehmonlar murabbiyi Ulug'bek Baqoev o'yin haqida o'z fikrlari bilan o'rtoqlashdi.

— Bugungi bahs juda katta qiziqish uyg'otishi aniq edi. Chunki medallar yo'lida biz, AGMK, «Nasaf» jamoalari qattiq kurashdi. O'yin ancha yaxshi bo'ldi, jonli o'yin ko'rdik. Mezbonlarda bir nechta yaxshi vaziyatlar bo'ldi, bizda ham bo'ldi. Biroq raqibniki ancha ko'proq bo'ldi. So'nggi daqiqalarda jamoamiz penalti tepishga erishdi va g'alabani qo'lga kiritdik. Biz eng minimum natijaga umid qilgan edik, baxtimizga eng mukammaliga ega bo'ldik. Bu yili «So'g'diyona» va AGMK medallarga «Nasaf»dan ko'proq haqli edi. Mavsum davomida biz va AGMK jamoasi ikkinchi va uchinchi o'rin uchun kurashni davom ettirdi. Ularni uchinchi o'rini olishgani bilan tabriklayman. Ajoyib natija uchun jamoamiz futbolchilarga va jamoa rahbarlariga minnatdorchilik bildiraman. Barcha jizzaxlik muxlislarni ajoyib natija bilan tabriklayman.

— Mavsum o'rtalarida jamoangiz o'yini haqida bir nechta maqolalar chiqdi. Siz esa ularga mavsum yakunida ko'ramiz dedingiz...
— To'g'risini aytganda, bu jurnalist kim ekanligini bilmayman. U qaerdan bunday statistikani olganini bilmayman. Futbolda ko'plab natijalarni hisobga olish kerak, biroq u biz haqiqatdan ham eng yomon bo'lgan vaziyatlardagi statistikani olgandi. Jamoa uchun faqat natija kerak. Jamoa bu uchun qanday o'ynaydi. Istasa himoyadan o'yin olib boradi yokida hujum qilib. Siz esa bor futbolchilaridan foydalangan holda o'yin taktikasini ishlab chiqasiz. Futbolchilar hujumda ham ancha yaxshi harakat qilishadi, biroq ular himoyaviy futbol orqali yanada yaxshiroq o'yin olib borishgani uchun ham biz shunday harakat qildik. Bunday jamoalar juda ko'p. Uning fikrlari xato edi va gaplarini qaytarib olgani ma'qul.

— O'sha jurnalist (Faxriddin Ro'ziev)ga taqdirlash marosimida kumush medalingizni taqib qo'ysangiz qanday bo'ladi?
— Bu murabbiylik faoliyatimdagi ilk medalim. Menimcha, bu men uchun eng muhim va unutilmas medal bo'ladi. Shu sababli ham barcha futbolchilarimga shunday ajoyib lahzalarni taqdim etganlari uchun minnatdorchilik bildiraman.

— Agar «Paxtakor» kubok bahslarida ham g'alaba qozonsa, «So'g'diyona» OChL saralash bahslarida «Al-G'arafa»ga qarshi maydonga tushadi. Shu sababli ham jamoaning selektsiya ishlari qanday bo'ladi?
— Biz hali bu haqida o'ylab ko'rmadik. Hali yakunlanmagan ishlar bor va buni omma oldida gapirmagan ma'qul. Hozircha bu haqida gapirmayman. Barchani bugungi natija bilan tabriklab qolaman.