Toshkent mezbonlik qiladigan karate bo'yicha Osiyo chempionatining sanasi va musobaqaga doir savollarga oydinlik kiritildi

Osiyo karate federatsiyasining (OKF) Bosh menejeri Vinsent Chenning poytaxtimizga qilgan bir necha kunlik tashrifi yakunlandi. Ushbu tashrif davomida mehmon Toshkentning bo'lajak Osiyo chempionatini qabul qila olish salohiyati va imkoniyatlari haqida o'rganib, o'zining ijobiy xulosalarini bildirib ketdi.

Musobaqaga taalluqli sanalar

Muzokaralar davomida bo'lajak qit'a chempionati qaysi sanalarda bo'lishi, undan oldin OKF tashkil qiladigan seminarlarning ham sanalariga oydinlik kiritib olindi. Unga ko'ra, 15-18 iyul kunlari qit'amiz hakamlari, murabbiylari, tashkilot ijroqo'm a'zolari uchun seminar, shuningdek, bu kunlar davomida OKFning navbatdagi Kongressi ham bo'lib o'tadi. Bellashuvlar esa 19-21 iyul kunlari o'tkaziladi. Bahslarga «O'zbekiston» sport majmuasi mezbonlik qilishi kutilmoqda.

G'olibga beriladigan reyting ochkolari

Osiyo chempionati karate bahslarida jahon chempionatidan keyin Olimpiya o'yinlariga eng yirik litsenzion ochko beradigan musobaqadir. Unda g'olib chiqqan sportchilar 970 reyting ochkosini qo'lga kiritadi. Taqqoslash uchun, Premer liga bahslari g'olibi 530, A seriyada muvaffaqiyatga erishgan sportchilar 215 reyting ochkolariga ega bo'lishlari mumkin. Shunday ekan, Osiyo chempionatida g'olib chiqish orqali Tokio Olimpiadasi litsenziyasini deyarli hal qilish imkoniyati bor.

Vazn toifalari

Umuman olganda karate bahslarida erkaklar toifasida 6 ta, ayollarda 5 ta vazn bor. Osiyo chempionatida ham odatiy vazn toifalari amal qiladi. Biroq Xalqaro olimpiya qo'mitasi talabiga ko'ra Tokio-2020 da 3 tadan vazn toifalarida bahslar bo'ladi. Ya'ni, Olimpiya o'yinlari dasturiga kiritilgan vazn toifalarida raqobat keskin bo'lishi kutilmoqda.

Medallar jamlanmasi

Shuningdek, erkaklar va ayollar o'rtasida jamoaviy kata bellashuvlari ham bor. Osiyo chempionati shaxsiy birinchilikda 11 vazn toifasida, qolaversa, erkaklar va ayollar o'rtasida jamoaviy kata hamda kumite bahslari bo'yicha o'tkaziladi. Shu tariqa, qit'a birinchiligida jami 15 komplekt medallar jamlanmasi o'z egalariga topshiriladi.

Olimpiada yo'llanmalari

Reglamentga ko'ra, Tokioda har bir vazn toifasida 9 sportchi ishtirok etishi mumkin. Bunda bittadan o'rinlarni mezbon jamoa vakillari band qilib bo'lishgan. WKF reytingida eng kuchli to'rtalikka kira olgan sportchilar to'g'ridan to'g'ri yo'llanma qo'lga kiritishlari mumkin. Qolgan 4 yo'llanma esa 2020 yil may oyida Parijda bo'ladigan musobaqada o'ynaladi.