Temur Kapadze: «O'tish o'yiniga jiddiy tayyorgarlik ko'ramiz»
/ Kiritdi: BestMaster Ko'rilgan: 131
Pro-liganing 24-turidan o'rin olgan «Nurafshon» - «Olimpik» (3:2) uchrashuvidan so'ng jamoamiz bosh murabbiyi Timur Kapadze matbuot anjumanida ishtirok etdi.
— Qo'lga kiritilgan 3-o'rin uchun jamoamiz a'zolari va muxlislarini tabriklayman. Superligaga o'tish o'yinida ishtirok etamiz. «Nurafshon» o'z oldiga aniq vazifa qo'ygan klub, shu sabab bugungi o'yin oson o'tmasligini bilardik. Ularga kelgusida omad yor bo'lishini tilayman.
Bu kabi o'yinlar bizga katta tajriba bermoqda. Bugun g'alaba uchun kelgandik va buning uchun oxirigacha harakat qildik. Yigitlar bunaqa o'yinlar orqali ham ruhan, ham jismonan o'sib borishadi. O'tish o'yiniga tayyorgarlikni boshlaymiz. Superliga oxirgi turida raqibimizni bilib olamiz.
— Mavsumdan qay darajada ko'nglingiz to'ldi?
— Bizda yosh yigitlar bor edi va maqsadimiz ularni yanada yuqori darajaga olib chiqish bo'lgan. Yosh futbolchilar o'sayotgan davrda ularni kuchli futbolchi sifatida kamol toptirish uchun shu kabi chempionatdagi ishtirok qo'l keldi albatta. O'ylayman-ki, biz maqsadimizga erishdik.
“Oq-tepa" jamoasining Pro-ligani tark etishi evaziga biz 6 ochko yo'qotdik. Bundan tashqari o'yinlar soni ham kamayib qoldi. To'g'ri, kubok uchrashuvlarida ham ishtirok etdik va o'zimiz uchun muhim o'yinlarni o'tkazdik deb o'ylayman.
— O'tish o'yinida qaysi jamoa bilan to'qnash kelishni istagan bo'lardingiz?
— Hozir Superligada jiddiy kurash kechmoqda. Barchasi so'ngi turda hal bo'ladi. Kim raqib bo'lsa ham 2 dekabr kuni muxlislar chiroyli o'yin ko'rishadi deb o'ylayman. To'g'ri, orada bizda bir oz tanaffus bo'ladi, lekin bu o'yinga jiddiy tayyorgarlik ko'ramiz.
Bosh sahifaga
269