Mirjalol Qosimov: «Afsus, 2-o'rin masalasini so'nggi turga qoldirdik»

AGMK bosh murabbiyi Mirjalol Qosimov Superliganing 25-turi doirasida bo'lib o'tgan "Qo'qon-1912"ga qarshi o'yin (2:2) borasida o'z fikrini bildirib o'tdi.

«Bugun biz uchun juda mas'uliyatli o'yin edi. Qolaversa, bugun qiziqarli va dramatik ruhdagi uchrashuv guvohiga aylandik. Agar g'alaba qozonganimizda 2-o'rin masalasi hal bo'lardi. Afsus, ushbu masala keyingi o'yinga qoldi. Yigitlar oxirigacha kurash olib borishdi, mezbonlar ham bizga qarshi juda yaxshi harakat qilishdi. Bugungi o'yin muxlislarga yoqdi deb o'ylayman. Agar Kasyan 90-daqiqada yuzaga kelgan imkoniyatdan foydalana olganida, g'alaba qozonishimiz ham mumkin edi.

Oldinda O'zbekiston kubogi yarim final bahsi bizni kutib turibdi. Tezroq tiklangan holda ushbu o'yinga tayyorgarlik jarayoniga kirishimiz zarur.

VAR yo'qligi natijaga ta'sir qildimi? Yo'q, bunday deb o'ylamayman. VAR yo'qligi bir jihatdan yaxshi bo'ldi. Nega deganda bugungi uchrashuv jozibador ruhda o'tdi. Ko'p to'xtalishlar bo'lmadi, o'yin vaqtini yutqazmadik. Har ikki jamoa g'alaba uchun maydonga tushgani ko'rinib turdi», — dedi Qosimov.