Pavel Zabelin: «Mablag'ni asosiy o'ringa qo'ymayman»

«Andijon» klubida to'p surayotgan legionerlar orasida belaruslik Pavel Zabelinni alohida ko'rsatsak arziydi. Hujumkor yarim himoyachi ikkinchi davra boshida jamoaga qo'shildi va darhol kerakli o'yinchi ekanligini isbotladi. Bir qator gollar urdi, maydonda ham foydali futbolchiligini namoyish etib kelyapti. Mahalliy muxlislarda ham u juda iliq taassurot qoldirayotgani bor gap. «Andijon» klubi matbuot xizmati Pavel Zabelin bilan suhbat uyushtirdi. Unda futbolchi bir qator masalalarda fikr bildirdi.

«Klubdagi holatim to'liq qanoatlantiryapti»

- O'zbekistonga tashrifimizning ikkinchi kunidayoq, chempionat doirasidagi navbatdagi turda maydonga tushishimizga to'g'ri kelgan. Shuning uchun jamoadoshlarimiz bilan oson chiqishib ketdik. Muloqot chog'ida ayrimlari bilan til borasida muammo yuzaga keladi, lekin munosabatlar chakki emas. A'lo darajada deyish uchun esa asoslarga ega emasman. Baribir, har bir klubda xorijlik o'yinchilar ko'proq o'zaro muloqot qilishadi. Bu yashiradigan jarayon emas. Klubdagi holatim to'liq qanoatlantiradi.

«Pul tomondan «Andijon»ga o'tib yutqazdim, deya olmayman»

- Turmush o'rtog'im kelganimga bir hafta o'tgach, ortimdan Andijonda hozir bo'ldi va bu holat ruhiy tomondan dalda ekanligini ta'kidlashim o'rinli. Klub mutasaddilari yashash sharoitim borasida barcha imkoniyatlarni havola etishdi, nolimayman. Ayolim bilan alohida kvartirada istiqomat qilyapmiz. Pul tomondan «Andijon»ga o'tib yutqazdim, deya olmayman. G'alaba uchun mukofot pullari to'lanmoqda.

«Shaxtyor»ga tegishliman, yana ikki yillik shartnomam bor»

- Kelasi mavsum borasidagi savolingizga javobni mustaqil tarzda bera olmayman. Sababi, jamoada ijara asosida to'p surmoqdaman. Belarus chempionatida to'p suruvchi Soligorskning «Shaxtyor»iga tegishliman. Yana ikki yillik shartnomam qolgan. Yangi klubim har tomonlama ma'qul tushmoqda.

«Maydonga tushganda mablag'ni emas, natijani birinchi o'ringa qo'yaman»

- Albatta, Superligada qolish uchun bor kuchimizni bermoqdamiz. Legioner o'yinchi bo'lsam-da, ertaga ketganimdan keyin jamoa Zabelinlar to'p surgan mahalda quyi divizionga tushib ketgandi, deyishlarini istamayman. Shu sababli, maydonga chiqqandan keyin mablag'ni asosiy o'ringa qo'ymayman, natija birinchi o'rinda turadi. Har o'yinda gollar urib, muxlislarni xursand etgim keladi.

«Salbiy tomoni - maydonimizning chimi yomon»

- Salbiy tomon sifatida o'z maydonimizdagi chimning holati yomonligini aytmoqchiman. Futbol o'ynash mashaqqat. Birgina kamchilik shu. Tartibga keltirsa bo'ladigan ahvol.

«Andijon» PFK matbuot xizmati

Manba: interfutbol.uz