La liga. «Barselona» Messining xet-trigi evaziga «Betis»dan revansh oldi

Ispaniya La ligasining 28-turiga yakun yasaldi. "Barselona" safarda "Betis" mehmoni bo'lib, yirik hisobda g'alaba qozondi. Birinchi davrada "Kamp Nou"da bo'lib o'tgan bahsda andalusiyaliklar nomdor raqibni 4:3 hisobda g'alaba qozonishgandi.

Bu safar ham "Betis" kuchli pressing orqali o'yinni boshladi. Valverde bunga tayyor ekanini namoyish qildi va raqibini har tomonlama tor-mor etdi. Kataloniyaliklar raqibning hujumini bartaraf etib, o'zlarining ilk xavfli vaziyatini golga aylantirishdi. Lionel Messi 22 metrlardan belgilangan jarima to'pini kuchli zarba bilan golga aylantirdi.

Birinchi bo'limga qo'shib berilgan daqiqalarda Suaresning ajoyib uzatmasidan keyin Leo yakkama-yakka vaziyatga chiqib ketdi va "Betis" darvozasini osonlik bilan ishg'ol etdi.

Ikkinchi bo'lim o'rtalarida Suaresning o'zi raqibning 3 nafar futbolchisini bitta fint bilan ortda qoldirib, darvozani zabt etdi.

O'yin tugashiga 8 daqiqa qolganida Moron bitta javob to'pini kiritib, uchrashuvga biroz intrigani qaytargandek bo'ldi. Ammo oradan 3 daqiqa o'tib Messi yana bir shedevr gol muallifiga aylandi. U 12 metrlardan parashyut zarba berib, "to'qqizlik"ni ishg'ol qilib qo'ydi — 1:4.

Bahsga qo'shib berilgan daqiqalarda Lionel "poker"ni ham rasmiylashtirishi mumkin edi, ammo raqib posboni qiyinchilik bilan bo'lsa-da, Messi tomonidan yaqin masofadan berilgan zarbani qaytardi.

Shu tariqa, "Barselona" ikkinchi o'rindagi "Atletiko"dan 10 ochkoga ilgarilab ketdi.

Ispaniya La ligasi, 28-tur
Betis – Barselona 1:4 (0:2, 1:2)
Gollar: 0:1 – 18 Messi, 0:2 – 45 Messi, 0:3 – 63 Suares, 1:3 – 82 Moron, 1:4 – 85 Messi.
Betis – Lopes, Bartra, Sidney, Mandi, Kanales, Sanches (Emerson, 67), Telo, Lo Chelso (Laynes, 68), Xese, Guardado, Vilyam Karvalyu (Moron, 75).
Barselona – ter Shtegen, Langle, Pike, Serdji Roberto, Alba, Buskets, Artur (Nelson Semedu, 64), Rakitich (Alenya, 88), Vidal, Messi, Suares (Koutino, 90).
Ogohlantirishlar: Guardado (16), Langle (52), Nelson Semedu (67).