Munosabat: «Krishtianu tufayli jamoaviy o'yinni yo'qotdik...»

«Yuventus» faxriylari - Leo­nardo Bonuchchi va Jorjo Kellinining aytishlaricha, Krishtianu Ronaldu «keksa sinora»da yo'lga qo'yilgan jamoaviy o'yinga jiddiy putur etkazibdi. To'g'ri, ular shuning barobarida portugaliyalik yulduz bilan birga o'ynashning ijobiy tomonlarini ham tilga olishdi. Turin klubi joriy mavsum «A» seriyada o'ta omadsiz start oldi. Deylik, «Yuve» dastlabki 4ta turda atigi 2 ochko oldi. Hozir ham jamoa­ga barqarorlik etishmayapti.

***

Tajribali himoyachi Jorjo Kellini hozirgi omadsizliklarni Krishtianu Ronaldu jamoadan nisbatan kech ketgani bilan izohlamoqla: «U jamoa bilan 28 avgust kuni xayrlashdi, agar ertaroq ketganida, o'z o'yinimizni o'nglab olishga ulgurardik. Qisqasi, dastlabki turlardagi yo'qotishlarni aynan Ronalduning ketishga kechikkani bilan bog'layman. Deylik, u 1 avgust kuni ketganida, chempionat startiga yaxshiroq tayyorgarlik ko'rish uchun etarli vaqtga ega bo'lardik. Gap shundaki, ma'lum vaqt aynan Krishtianu orqali, to'g'rirog'i, uning uchun o'ynashga o'rganib qoldik. Bu Ronaldu uchun muhim. Shaxsan men hech narsadan hayron qolmadim: 3 yil davomida Krishtianuning jamoa aynan o'zi uchun o'ynashini xohlashi yaqqol sezilib turdi».

***

Bundan oldinroq Leonardo Bonuchchi ham Ronalduga haddan ortiq darajada umid bog'langani xususida gapirgandi: «Ochiq aytaman, bizda «Dunyoning eng kuchli futbolchisi «Yuventus» g'alabasini kafolatlashga qodir» qabilida tushuncha yo'q emasdi. Ha, Krishtianu o'yinimizga ham, o'zimizga ham katta ta'sir o'tkazdi. U bilan mashg'ulotda birga ishlash - g'ayrioddiy jarayon. Biroq yigitlar ongsiz ravishda Ronalduga g'alaba kafolati sifatida qarashdi. Oqibatda qaerdadir talabni pasaytirdik, o'zimizni qiynamay qo'ydik. Ayniqsa, oxirgi mavsumda shunday bo'ldi. Yana to'pni Ronalduga uzatish natija keltirishiga ishonib qoldik. Vaholanki, u ham jamoaviy o'yinga muhtoj edi. Oddiy aytganda, bizga o'zaro tushunib harakatlanish etishmadi»

***

Bonuchchi keyinroq yana shu mavzuni ko'tarib, Krishtianuni jamoa­viy o'yinni buzganlikda ayb­ladi: «O'ylaymanki, hozir yana jamoaviy o'yinni izga solyapmiz. Oxirgi mavsumlarda shu jihatda oqsadik, chunki buyuk chempion bilan o'ynab, ko'proq uning muvaffaqiyatiga hissa qo'shishni xohladik. Ronalduning o'yinlar taqdirini yolg'iz o'zi hal qilishiga ishongandik. Endi g'alabalarni kafolatlaydigan haqiqiy kamtarlik va jamoaviy harakatni tezroq qayta tiklashimiz zarur».

***

Kellini va Bonuchchi izohlaridan keyin Turinda chiqadigan Tuttosport nashri yanada keskin xulosa chiqardi: «Kellini ham, Bonuchchi ham Krishtianudan minnatdorlar va uning iste'dodiga hurmat bilan yondashadilar. Ammo tan olish kerak, Ronaldu «Yuve»ning birdamlikka asoslangan o'yin tizimidagi muvozanatni buzib ketdi. Oxirgi 10 yillikka qarasak, «Yuventus»da ajoyib hujumchilar (Teves, Manjukich, Iguain) va har bir pozitsiyada buyuk chempionlar (Pirlo, Pogba, Vidal, Dani Alvesh, Xedira) o'ynashgan. Muhimi, ular jamoaning muqaddas qonuniyatiga moslashishgandi. Himoyada o'zini suruvdek tutadigan jamoada «Bir kishi hamma uchun, hamma bir kishi uchun» qoidasi hukmron edi. Ya'ni har bir futbolchi g'alaba yo'lida o'z roli va vazifasini osongina o'zgartirardi. Ronaldu esa jamoaning bir qismiga aylanolmadi, hattoki, chin etakchi rolida maydonga tushganida ham. Misol uchun, hech qachon himoyaviy o'yinga hissa qo'shmadi. Bu holat shu paytgacha «Yuven­tus»ni yaxlit kuch sifatida ushlab turgan qonunni buzdi: muvozanat, itoatkorlik va birlikka putur etdi. 3 yil davomida kiyinish xonasidagi tartib ham o'zgardi. Agar qaysidir qonun hamma uchun birdek qo'llanilmasa, xavfli yoriqlar paydo bo'ladi. Xullas, barchasi jamoaning maydonda kuchsizlanishiga olib keldi».

Krishtianu Ronaldu «Yuventus» safida jami 134ta o'yinda maydonga tushib, 101ta gol urishdan tashqari, 22ta samarali uzatma muallifiga aylandi. Endi u o'zining barcha plyus va minuslari bilan «MYu»da to'p surmoqda.