A seriya. Milan derbisida «Inter» g'alaba qozondi

Italiya chempionatining 28-turi doirasida markaziy o'yin bo'lib o'tdi. Muxlislar "San-Siro" stadionida bo'lib o'tgan Milan derbisiga guvoh bo'lishdi.

Bu bahsda rasmiy mehmon maqomiga ega bo'lgan "Inter" tezkor gol urishga muvaffaq bo'ldi. Uchrashuvning 3-daqiqasidayoq Vesino hisobni ochishga muvaffaq bo'ldi. Ushbu gol "neradzurri" foydasiga ishladi. Tanaffusga qadar ular raqib darvozasiga yana kamida 2ta gol urishlari mumkin edi. Ammo yana o'sha Vesino qulay vaziyatlarni golga aylantira olmadi.

Ikkinchi bo'lim boshida esa burchakdan etkazilgan uzatmani Stefan de Vrey golga aylantirib, hisobdagi farqni ikkitaga oshirdi. Buyog'iga jamoalar hisobda quvlashmachoq o'ynashdi. Dastlab Bakayoko bosh bilan hisobdagi farqni qisqartirdi.

Bahsning 67-daqiqasida hakam "rossoneri" darvozasi tomon penalti belgiladi. Lautaro Martines undan samarali foydalandi. Oradan 4 daqiqa o'tib Musakko hisobni 2:3 ko'rinishiga keltirib qo'ydi.

Qolgan daqiqalarda Gattuzo shogirdlari hech bo'lmasa durangga erishish uchun oldinga tashlanishdi. O'yin qo'shib berilgan eng so'nggi — 6-daqiqada maydon egalari hisobni tenglashtirishlari mumkin edi. Ammo yaqin masofadan yo'llangan zarbani "Inter" himoyachisi mahorat bilan qaytarib qoldi.

Shu tariqa, "Inter" o'z ochkolarini 53taga etkazib, "Milan"ni quvib o'tgancha, 3-o'ringa chiqib oldi. "Rossoneri" esa 4-o'rinda qoldi. Ularning baxtiga "Milan" ta'qibchilari — EChL yo'llanmasi uchun kurash olib borayotgan "Roma" va "Atalanta" jamoalari ochko yo'qotishgandi.

Italiya A seriyasi, 28-tur
Milan – Inter 2:3 (0:1, 2:2)
Gollar: 0:1 – 3 Vesino, 0:2 – 51 de Vrey, 1:2 – 57 Bakayoko, 1:3 – 67, penalti Martines, 2:3 – 71 Musakko.
Milan – Donnarumma, Kalabriya, Musakko, Rodriges (Kutrone, 58), Romanoli, Lukas Paketa (Kastilexo, 46), Kessie (Konti, 69), Chalxanoglu, Bakayoko, Suso, Piontek.
Inter – Xandanovich, D`Ambrozio, Shkrinyar, Asamoa, de Vrey, Galyardini, Vesino (Ranokkiya, 90), Perishich, Brozovich (Valero, 73), Politano (Kandreva, 84), Martines.
Ogohlantirishlar: Brozovich (14), Rodriges (32), Romanoli (66), Vesino (79), Suso (79), Konti (89), Galyardini (90).