Morata: «Ronaldu ketganidan keyin «Yuventus»da barcha bosim ostida qoldi»

Huquqiy jihatdan «Atletiko»ga tegishli bo'lgan, ayni paytda ijara asosida «Yuventus»da o'ynayotgan Alvaro Morata ayni paytdagi o'zining formasi va Krishtianu Ronalduning jamoadan ketishi borasida o'z fikrini bildirib o'tdi.

"Ronaldu ketganidan keyin «Yuventus»da barchamiz bosim ostida qoldik. Ayniqsa, men ko'proq bosim ostidaman, chunki ijara asosida o'ynayapman. Ammo, o'z taqdiringizga xo'jayin bo'lishni istasangiz, faqat ishlashingiz kerak.

Men deyarli bir oy davomida maydonga tushmadim. Shuning uchun maydonga qaytishga shoshildim. O'zimni optimal formaga qaytara olmadim. Jamoa uchun ko'p ishlashimga to'g'ri keldi. Shu bois, ko'p gol ura olmayapman. Eng muhimi — o'ynash va murabbiy talab qilayotgan narsani bajarish», — dedi Morata.