Arsen Venger: «Yoshlar JChni har ikki yilda o'tkazish g'oyasini qo'llab-quvvatlashmoqda»

FIFAning jahon futbolini rivojlantirish bo'limi boshlig'i Arsen Venger 2024 yildan boshlab erkaklar o'rtasidagi musobaqalar taqvimiga o'zgartirish kiritish bo'yicha maslahatlashuv ishlarini olib bormoqda. Jumladan, jahon chempionatini har ikki yilda o'tkazish masalasi maslahatlarning markaziy pog'onasini egallagan.

UEFA ushbu taklifga qarshi chiqmoqda. Xususan, tashkilot rahbari Aleksandr Cheferin Mundial har ikki yilda o'tkaziladigan bo'lsa, Evropa mamlakatlari unga nisbatan boykot e'lon qilishini ta'kidladi.

Venger esa ushbu loyihani amalga oshirish mumkinligiga ishonmoqda.

"Meni hayron qoldirayotgani jamoatchilik fikrini o'zgartirishga urinishayotgani bo'lmoqda. Agar siz ko'chala har qanday odamdan ayollar o'rtasidagi jahon chempionatini har ikki yilda o'tkazish g'oyasiga nisbatan fikrini so'rasangiz, ular: "Bu ajoyib fikr, bu ayollar futbolining rivojiga hissa qo'shadi", deb javob berishadi.

Unda nima uchun bu yomon bo'lishi kerak? Odamlar asosan hissiyotga berilib qarshilik qilishmoqda. "Barchamiz JChni 4 yilda o'tkazish tsiklida ulg'aydik va buni shundayligicha saqlab qolishni istaymiz", deya javob berishadi.

Biz o'tkazayotgan so'rovnomalarda ikkiga ajralbshni kuzatyapmiz: yoshlar biz taklif qilayotgan g'oyaga rozilik bildirishmoqda, yoshi 50dan oshganlar esa — qarshi. Qo'rqishimiz kerak emas. Futbolni tomosha qiladigan zamonaviy yoshlar talabchan va o'zi tomosha qilayotgan o'yinga yuqori talab qo'yadi. Sifatga talab bor, biz esa ularga yuqori sifatni ta'minlashimiz zarur", — dedi Venger.