Ruminiyalik futbolchi futbol tarixida MTJ safida debyut qilgan eng yosh futbolchiga aylanishi mumkin

Ruminiya terma jamoasi bosh murabbiyi Mirel Redoy JCh-2022 saralash bosqichi doirasida bo'lib o'tadigan Islandiya va Lixtenshteynga qarshi o'yinlar uchun 15 yoshli Enes Salini tarkibga jalb qildi.

Yarim himoyachi Ruminiyaning "Farul" klubi a'zosi hisoblanadi. U 2006 yilda tavallud topgan.

Sali mamlakat yuqori divizionida joriy mavsumda debyut qildi. U 7ta o'yinda maydonga tushib, bitta gol muallifiga aylandi. Enes Ruminiya Oliy ligasi tarixida eng yosh gol muallifiga aylandi. E'tiborli tomoni, u 2017-2019-yillarda "Barselona" akademiyasida shug'ullangan.

Sali 2006 yilning 23 fevral kuni Kanadada tug'ilgan. Uning ota-onasi turk millatiga mansub bo'lib, ular Ruminiyada yashab kelishadi. Enes Kanada yoki Turkiya terma jamoalaridan birida to'p tepishi mumkin edi, ammo u Ruminiyani tanladi.

Agar Sali Ruminiya terma jamoasining noyabr oyidagi uchrashuvlarida ishtirok etsa, futbol tarixida milliy jamoa safida debyut qilgan eng yosh futbolchiga aylanadi.