Superliga. "Paxtakor" chempionlikni yirik hisobdagi g'alaba bilan nishonladi

Superliga 24-turida "Paxtakor" "Surxon" darvozasiga javobsiz besh to'p kiritib, chempionlikni ajoyib yutuq bilan tantana qildi.

O'yin boshidanoq tashabbusga erishgan jamoamiz chempionlikni nishonlash maqsadida stadionga kelgan ishqibozlarni ajoyib hujumlar bilan quvontirdi. Turg'unboevning ikki zarbasi noaniq chiqqan bo'lsa, Cheranning aniq urinishidan so'ng himoyachi to'pni qaytarib qoldi. 36-daqiqada hisob ochildi. Abror Ismoilovni raqib futbolchisi jarima maydonida yiqitgani sababli penalti belgilandi va bundan Cheran unumli foydalandi. Bo'lim oxirida Turg'unboev tepgan to'pni raqib posboni qaytarib qoldi.

Ikkinchi bo'limda "Sherlar" birin-ketin raqib darvozasini ishg'ol qilishdi. 62 va 68-daqiqalarda Temirov Cheranning uzatmalaridan keyin ikki bor termizliklar darvozasiga gol urishga erishdi. 78-daqiqada zaxiradan tushirilgan Azmiddinov boshi bilan to'p kiritdi. O'yinga yakuniy nuqtani esa Cheran qo'ydi. U bu safar Erkinovga nisbatan ishlatilgan qo'pollik uchun belgilangan 11 metrlik zarbadan foydalanib, o'zining mavsumdagi 16-golini urdi.

"Paxtakor" - "Surxon" - 5:0 (1:0,4:0)
6 noyabr. Toshkent. "Paxtakor" stadioni. 8379 tomoshabin.
Hakamlar: A.Risqullaev, A.Marajabov, Z.Abdurahmonov, A.Xudoyberganov.
Nazoratchi: M.Ismoilov.
Komissar: B.Aripov.

"Paxtakor": Suyunov, Alijonov (Azmiddinov, 55), A'zamov, Anzur Ismoilov, Sayfiev, Hamrobekov, Abror Ismoilov (Sobirxo'jaev, 55), Turg'unboev (Xolmatov, 72), Hamdamov (Erkinov, 72), Cheran (Iminov, 82), Temirov.

"Surxon": Nortojiev, Sohibov, Salimov, Toshpo'latov, Ahmadov (Yo'ldoshev, 73), Bobojonov (Xolto'raev, 57), Pirimov (Choriev, 73), Hasanov (Saidazimov, 69), G'ofurov, Shaydulov, Pavlenko (Norov, 57).

Gollar: Cheran, 36-pen - 1:0. Temirov, 62 - 2:0. Temirov, 68 - 3:0. Azmiddinov, 78 - 4:0. Cheran, 82-pen - 5:0.

Ogohlantirishlar: Bobojonov, 26. Sohibov, 35. Abror Ismoilov, 39. A'zamov, 65. Yo'ldoshev, 81.

Manba: Paxtakor Matbuot xizmati