Ravshan Ermatov futbol mahorati maktablarining mutasaddilari bilan yig'ilish o'tkazdi

Kecha O'FA birinchi vitse-prezidenti Ravshan Ermatov raisligida futbol mahorati maktablarining faoliyatini rivojlantirish bo'yicha olib borilayotgan ishlar va mavjud kamchiliklarni bartaraf etishga bag'ishlangan yig'ilish o'tkazildi.

Videoanjuman shaklida o'tkazilgan yig'ilishda hududlardagi FMM rahbarlari, ma'naviy-ma'rifiy ishlari bo'yicha direktor o'rinbosarlari va psixologlar yil davomida amalga oshirilgan ishlar bo'yicha hisobot berdi.

Futbol mahorati maktablarida yosh tarbiyalanuvchilar uchun yaratib berilayotgan shart-sharoitlar, ularning bo'sh vaqtlarini to'g'ri tashkil etish, turli to'garaklarga yo'naltirish, jismoniy va ruhiy holatini doimiy ravishda nazorat qilib borish ko'rsatkichlari tahliliy ma'lumotlar asosida muhokama etildi.

O'FA birinchi vitse-prezidenti Ravshan Ermatov tarbiyalanuvchilarning professional darajaga etishlarida murabbiyning o'rni alohida ekanligiga to'xtaldi. O'z navbatida, yosh futbolchilar uchun murabbiy — ham tarbiyachi, ham aka, ham sirdosh bo'lishi kerakligi, bolaning qalbiga quloq tutib, unga ruhiy dalda bergan holda kelajakka to'g'ri yo'nalish berishi zarurligini ta'kidladi.

Mahorat maktablaridan nafaqat futbolchi, balki professional tahlilchi, hakam, menejer va murabbiylar etishib chiqishi kerakligi, bu yo'lda bolalarni kuchli va irodali shaxs etib tarbiyalash muhimligi aytildi.

Shuningdek, yig'ilishda barcha hududlardagi FMM ma'naviy-ma'rifiy ishlar bo'yicha direktor o'rinbosarlari va psixologlarning yuqoridagi masalalar bo'yicha amalga oshirayotgan ishlari tinglandi. Yo'l qo'yilayotgan kamchiliklarni bartaraf etish bo'yicha mas'ullarga tegishli tavsiyalar berildi.

Manba: Telegram.me/FAUzbekistan