OFK Kubogi-2021 finaloldi matbuot anjumani: Ro'ziqul Berdiev fikrlari

OFK Kubogi-2021 final uchrashuvi oldidan matbuot anjumani bo'lib o'tdi. Unda “Nasaf” jamoasi ustozi Ro'ziqul Berdiev va jamoa etakchilaridan biri Umar Eshmurodov ishtirok etishdi.

Ro'ziqul Berdiev:
- Ertaga bizni final kutyapti. Ikkala jamoa ham finalga osonlikcha etib kelmadi. Shu sababli ikkala jamoa ham borini berib maydonda harakat qiladi.
Raqib jamoani yaxshi o'rgandik. Raqib – juda shakllangan jamoa. Tarkibida mahoratli futbolchilari ko'p. Ancha tartibli o'ynaydi. Yigitlarga raqib to'g'risida to'liq ma'lumot berishga harakat qildik.
Balki issiq ob-havo biroz qiyinchilik tug'dirishi mumkin, lekin bu bahona bo'la olmaydi. Qanday qiyinchilik bo'lsa-da biz final uchrashuvida juda yaxshi o'ynagan holda asosiy maqsadimizga etishga harakat qilamiz.
Final – bitta o'yindan iborat. To'g'ri, musobaqa to'purari, assistlar etakchilari, ko'p gol urilganligi kabi raqamlar va statistikalar biz tarafimizdadir. Lekin oldingi o'yinlar natijalarini unutgan holda bor e'tiborni oldindagi hal qiluvchi bahsga qaratamiz.

Umar Eshmurodov:
– Ertaga muxlislarimizni, xalqimizni chiroyli g'alaba bilan xursand qilish uchun maydonga tushamiz va borimizni beramiz.

Eslatib o'tamiz, "Al Muharraq" – "Nasaf" uchrashuvi ertaga Toshkent vaqti bilan 21:00 da start oladi.

Manba: Nasaf klubi matbuot xizmati