«Men qariya emasman» yoxud faoliyatini davom ettirayotgan top futbolchilar

Bundan 20 yil oldin 30 yoshli futbolchilar faxriy hisoblanar, bunday o'yinchilar kamtaronaroq takliflar olishar va maydonga kamroq tushishardi. Ammo hozir zamonaviy texnologiyalar, to'g'ri ovqatlanish va yuqori malakali fizioterapevtlar tufayli futbol va yosh cheklovlari degan tushuncha yo'qoldi. Hozir esa aynan 30 yoshdan yuqori, biroq amon ajoyib futbol namoyish etayotgan charm to'p ustalari haqida suhbatlashamiz.

Jorjio Kellini

 Italiyalik himoyachi «Yuventus»ning haqiqiy afsonasiga aylandi. Ancha yillar avval kelishilgan o'yinlar mojarosidan so'ng, turinliklarning B Seriyaga tushib ketishi, Jorjoga tarkibdan mustahkam o'rin egallashiga yordam berdi. Keyin himoyachi a'lo darajadagi o'yin ko'rsata boshladi.

Hozir 37 yoshda va u xuddi 20 yoshda bo'lgandek maydonda harakat qiladi. Uni hech qanday jarohatlar to'xtatmadi. Himoyachi bir necha marta miya chayqalgan, burni singan va boshqa ko'plab jarohatlar olgan. Italiyalik futbolchi maydonda ham, kiyinish xonasida ham haqiqiy etakchi. 2018 yilda Buffon «PSJ»ga ketganidan so'ng, Jorjio «keksa sinora» sardoriga aylandi. Afsuski, Kellini joriy mavsum uning faoliyatidagi so'nggisi bo'lishini aytdi.

Frank Riberi

Tajribali yarim himoyachi 2007 yilda «Bavariya»ga kelguniga qadar turli frantsuz jamoalarida o'ynagan. Frank tezda Myunxenda o'zini namoyon qildi va Aren Robben bilan ajoyib tandem hosil qilgan.

Riberi haqli ravishda eng yaxshi frantsuz futbolchilaridan biri hisoblanadi. Nemis klubida 12 yil davomida futbolchi 24 ta sovrin yutgan. 2019 yilda mashhur «chandiq» Germaniyani tark etishga qaror qildi. Frank «Fiorentina»ga o'tdi, chunki u yuqori saviyada o'ynashni xohladi. «Binafshalar» lagerida frantsuz tezda etakchiga aylandi va yosh futbolchilarga faol maslahatlar tarqata boshladi. Riberining qanchalik kuchli ekanligini 37 yoshli vingerning 2019/2020 yilgi mavsumda klubning eng yaxshi futbolchisi deb topilgani ham ko'rsatadi. Joriy mavsum avvalida Frank Italiyaning boshqa jamoasi «Salernitana» safiga borib qo'shildi.

Luka Modrich

Xorvatiyalik yarim himoyachi ko'p yillar davomida «Real»ning etakchilaridan biri bo'lib kelgan. Luka yildan-yilga ajoyib saviyani namoyish etishda davom etmoqda va pastga tushishni rejalashtirmayapti. Hozircha futbolchining faoliyatidagi eng omadli yil 2018 yil bo'lgan. Modrich jahon chempionatining eng yaxshi futbolchisiga aylandi, Mundial finaliga chiqdi, «Oltin to'p» bilan Chempionlar ligasida g'olib chiqdi. So'nggi paytlarda OAVda joriy mavsum «Real Madrid» tarkibidagi so'nggi mavsum ekanligi haqida faol yozishmoqda. Futbolchining o'zi u erda yana bir-ikki yil qolishni istaydi. Lukaning o'yin uslubini hisobga olsak, buni amalga oshishini taxmin qilish oson.

Fabio Kvalyarella

Italiyalik hujumchi hech qachon top deb hisoblanmagan. Faoliyati davomida u o'nlab jamoalarni o'zgartirdi, ammo Fabio o'zining eng yaxshi futbolini «Sampdoriya»da 30 yoshdan oshganidan so'ng ko'rsata boshladi. Kvalyarella 2018/2019 yilgi mavsumda 26 gol bilan A Seriyaning eng yaxshi to'purari bo'ldi.  Xuddi shu 2019 yilda italiyalik ligada qatorasiga 11 o'yinda gol urib, Batistutaning rekordini yangiladi. Hozir Fabio 38 yoshda. Biroq, forvard faoliyatini yakunlashga shoshilmayapti. Yana bir necha mavsumda Kvalyarella Italiyada o'ynashni rejalashtirgan.

Jeyms Milner

Boshqa ko'plab jamoalarda 35 yoshli Milner rotatsiya o'yinchisi bo'lardi va tobora zaxirada o'tirardi. Lekin «Liverpul»da emas. Yurgen Klopp bir necha yillardan buyon inglizdan maksimal darajada foydalanib kelmoqda. Nemis mutaxassisi qo'l ostida Jeyms har ikki qanotda o'ynaydi: yarimhimoya markazida va tayanch zonasida ham o'z o'yinini namoyish etadi. Muxlislar futbolchini «temir odam» deb atashadi va u o'z taxallusiga to'liq mos keladi. Ingliz «qizillar»da deyarli ajralmas futbolchi hisoblanadi. Jamoada juda ko'p yulduzlar bor: Alissondan tortib Salohgacha. Ammo ko'p odamlar Jeyms asosiy futbolchi ekanligini unutishadi.

Xoakin Sanches

Ispaniyalik futbolchi faoliyatini 1999 yilda «Betis»da boshlagan. Va, ehtimol, u o'sha erda tugatadi. Xoakinning «oq-yashillar» lageriga qaytganiga  6 yil bo'ldi. Sanches 40 yoshda, lekin u o'ynashda va jamoani oldinga tortishda davom etmoqda. Muxlislar uni futbolga va klubga bo'lgan munosabati uchun kumir qilishadi. Xoakinning jamoadoshlari ta'kidlashicha, u hali mashg'ulotlarga birinchi bo'lib keladi va oxirgi ketadi. «Betis» Sanchesning yana bir-ikki yil seviliyaliklar safida o'ynashiga umid qilmoqda va unga yangi taklif tayyorlamoqda.

Serxio Ramos

Ramosning o'yini va tashqi ko'rinishiga qarab, uni hech qachon 35 yoshda deb ayta olmaysiz. «Real» sobiq sardori har yili ajoyib o'yin ko'rsatardi. Biroq joriy mavsum emas. Sababi «PSJ»ning yangi a'zosi jarohat sabab o'yin amaliyotiga ega bo'lmayapti. Himoyachi «qaymoqranglilar» safida 100 tadan ko'proq gol urgan. Bu yutuqga avval faqat bitta himoyachi – Fernando Yerro bo'ysungan. Qolaversa, yuzta goldan 55 tasini ispaniyalik futbolchi boshi bilan ishg'ol qilganini ham ta'kidlash joiz.

Garchi, omadsiz mavsum bo'lsada, Ramos hamon futbolda va yaqin kunlarda el-kaptano o'z o'yinini topishga shubha yo'q.

Leo Messi

Bir paytlar argentinalik futbolchi nafaqat etakchi, balki «Barselona»ning ramzi ham edi. Ammo, moliyaviy muammolar sabab, o'tgan yozda futbolchi kataloniyaliklar safini tark etishga majbur bo'ldi. Leo anchayin qudratli bo'lgan «PSJ» safiga borib qo'shildi. Messi 34 yoshda, ammo hujumchining mahorat darajasiga hamma havas qiladi. Joriy mavsum boshi Lionel uchun yaxshi kechmayapti. Biroq, yangi jamoa, yangi muhit va yangi futbolchilar. Bu albatta, futbolchiga o'z ta'sirini o'tkazmasdan qolmaydi.

Krishtianu Ronaldu

Portugal futbolchisi yaxshi sharob kabi yildan-yilga yaxshilanib boraveradi. U 36 yoshda va hamon ajoyib futbol ko'rsatishda davom etmoqda.

Krishtianu ketma-ket 20-mavsum gol urdi. Ronaldu joriy mavsum avvalida «MYu»ga ko'chib o'tdi va Manchesterda ham qutqaruvchi rolini qoyilmaqom tarzda uddalamoqda. Qariya APLning joriy mavsumida 7 uchrashuvda maydonga tushib, 4 gol urdi. Bizningcha, ushbu 36 yoshli futbolchi uchun yomon natija emas.

Zlatan Ibragimovich

Ibragimovich «PSJ»dan MLSga ketganidan keyin hamma shved qo'shimcha pul ishlab, faoliyatini yakunlashga qaror qildi, deb o'ylagandi. Lekin, unaqa emas. Ibragimovich AQShning eng yaxshi futbolchilaridan biriga aylandi va ikki yil avval Evropaga qaytdi. Forvard «Milan»ga qo'shildi va ketma-ket uchrashuvlarda gollar kiritishni boshladi.  Ibra joriy mavsum A Seriya 7 bahsida maydonga tushib, 3 gol muallifiga aylangan.


Jamshidjon Mahmudov tayyorladi.