Ikki nafar hamyurtimiz jahon chempionligini qo'lga kiritishdi

Shu kunlarda jahonning eng kuchli harbiy dzyudochilari chempionlik uchun kurash olib borishmoqda. Kecha start olgan musobaqaning dastlabki kunidayoq ikki nafar hamyurtimiz jahonda tengsiz ekanliklarini isbotlashdi.

-52 kg vazn toifasida yurtimiz sharafini himoya qilgan kadetlar o'rtasida jahon chempioni Diyora Keldiyorova endi harbiylar o'rtasida ham jahon chempioniga aylandi. U to'g'ridan-to'g'ri yarim finaldan bahslarga qo'shildi. Bu bosqichda frantsiyalik Cheenne Munierni, finalda esa yana bir mezbonlar vakilasi Julie Veyll Dit Moreyni mag'lubiyatga uchratdi.

Erkaklar o'rtasidagi musobaqaning -60 kg vazn toifasidagi bellashuvlarida tatamiga chiqqan Dilshodbek Baratov avstriyalik Daniel Leutgeb, eronlik Muhammad Hoseyn, finalda esa frantsiyalik Jolan Florimontdan ustun keldi va shohsupaning eng yuqori pog'onasiga ko'tarildi.

O'z tarixida yubiley 40-marotaba tashkil etilayotgan musobaqa 4 noyabrgacha davom etadi.