Belgrad-2021. JChda dastlabki sensatsiya: Kubalik 2 karra olimpiada chempioni ilk bosqichdayoq yutqazdi (video)

Serbiyada boks bo'yicha jahon chempionatida dastlabki sensatsiya yuz berdi. 71 kg. vaznda ishtirok etayotgan kubalik Ronel Iglesias Belgraddagi musobaqani ilk jangdan keyinoq tark etdi.

33 yoshli bokschi turnirning 1/32 final bosqichi doirasida iordaniyalik Ziyod Yashashga qarshi ringga ko'tarildi. Osiyolik sportchi ilk soniyalardan tajovuzkor jang qila boshladi va raqibiga ko'plab zarbalar berdi. Dastlabki daqiqa ortda qolgan vaziyatda Iglesiasning qoshi yorildi va qon to'xtamadi. Natijada musobaqa shifokori jangni to'xtatishga qaror qildi. Bir daqiqalik jang hisob-kitoblari bo'yicha hakamlar g'alabani Ziyod Yashashga taqdim etishdi.

Eslatib o'tamiz, Iglesias ikki karra olimpiada chempioni (2012 va 2020) hisoblanadi. U 2009 yilda jahon chempionligini qo'lga kiritgan. Shuningdek, kubalik bokschi hisobida Pekin-2008 olimpiadasi bronza medali va Gamburg-2017 JCh kumush medali (finalda Shahram G'iyosovga yutqazgan) ham bor.

Ushbu vaznda g'oliblikka da'vogar sifatida Ronel Iglesias va Shahram G'iyosov tilga olinayotgan edi. Qur'aga ko'ra, ular faqat finalda uchrashishlari mumkin edi.