Belgrad-2021. Do'smatov - Bibosinov jangida hakamlarning baholari to'g'ri bo'ldimi?

"The Fight Site" jurnalisti Teylor O’Xiggins boks bo'yicha jahon chempionatida 51 kilogramm vazn toifasida bo'lib o'tgan Hasanboy Do'smatov va Saken Bibosinov o'rtasidagi jangga o'z munosabatini bildirdi.

Eslatib o'tamiz, hakamlarning qarori bilan qozog'istonlik bokschi g'alaba qozondi — 0:5 (28:29, 28:29, 28:29, 27:30, 27:30).

«Nazarimda, Bibosinovga qarshi jangda hakamlarning baholari borasida Hasanboy Do'smatovga omad kulib boqmadi. Bu saviya borasida bir-biriga yaqin bokschilarning o'zaro jangi bo'ldi. Unda istalgan sportchi g'olib chiqishi mumkin edi. O'zbekistonlik sportchi ikkinchi raundda yaqqol g'alaba qozondi (ammo hakamlarning 3 nafari ikkinchi bo'limda ustunlikni Bibosinovga berdi — Stadion.uz izohi). Saken esa uchinchi raundda ustunlikka erishdi. Barcha narsa birinchi raundda kim g'alaba qozondi, deya hisoblashingizga bog'liq.

Bibosinov zarbalarining aksariyat qismi raqib qo'lqopiga tegdi yoki mo'ljalga aniq bormadi, ammo u Do'smatovning xuk zarbalari noaniq chiqishiga majbur qildi va bir nechta aqlli harakatlarni amalga oshirdi. Ammo Hasanboy dastlabki 2ta raundda haqiqiy muvaffaqiyatga erishdi.

Do'smatov birinchi bo'limni ishonchli boshladi, ammo Bibosinov raundning so'nggi daqiqasida o'ziga keldi. Natijada 4 hakam o'z bahosini unga berdi. Har qanday holatda ham hozircha bu musobaqadagi eng yaxshi jang bo'ldi. Afsuski, ular ilk bosqichdayoq to'qnash kelib qolishdi», — deya yozdi jurnalist tvitter orqali.