Ro'ziqul Berdiev: «Bosh hakam «Andijon» foydasiga ko'p qaror chiqarishini bilardik»

Biroz avval O'zbekiston Superligasi 23-tur doirasidagi so'nggi uchrashuv yakunlandi. «Andijon» o'z maydonida «Nasaf»ni qabul qilib, 1:1 hisobida durangga imzo chekdi. O'yindan keyin Qarshi klubi ustozi Ro'ziqul Berdiev o'yin haqida fikrlari bilan o'rtoqlashdi.

- Bugungi bahsda maydon bilan ham, raqib bilan ham ancha kurashdik. Uchrashuvda futbolchilarga yakkakurashlarda mag'lub bo'lmaslik ko'rsatmasi berilgandi. Raqibimiz ko'proq standart vaziyatlardan o'z omadini sinab ko'rishini bilardik va jamoamga ham shu haqida ko'rsatma berilgandi. Afsuski, birinchi taymda aynan standart vaziyatdan gol o'tkazib yubordik. Ikkinchi bo'limda biz o'z o'yinimizni namoyish etishni boshladik. Hisob tenglashgandan keyin ham Andriya Kaluderovich va G'olib G'aybullaevda ikki qulay vaziyat bo'ldi. Golli vaziyat haqida gapiradigan bo'lsam, bilmadim, hakam nega bunday qaror chiqardi?! O'zi o'yin boshlanishidan oldin, bosh hakam «Andijon» foydasiga ko'p qaror chiqarishini bilardik. Darvozamiz tomon belgilangan penalti qo'yilgan holat 11 metrlik jarima zarbasi belgilanadigan vaziyat emasdi. O'yin avval futbolchilarim menga bugungi o'yinda g'alaba qozona olmasligimizni aytishgandi. Shu sabab, o'yinni davom ettirmaslikka qaror qildik. Agar, biz muxlislar mehrini qozongan bo'lsak, o'z o'yinimiz, g'alabalarimiz orqali qozondik. Bizga hech kim yordam bermagan. OFK kubogi finali haqida o'ylaganimiz yo'q, lekin ko'plab futbolchilarimizda charchoq alomati bor edi. Bugungi bahsda har ikki jamoaga ham ochko zarur edi. Sababi, raqib elitada qolishga, biz esa medallar uchun kurashmoqdamiz. Maydon holatida haqida ham to'xtalib o'tmoqchiman, bu stadionda «Nasaf» o'z o'yinini namoyish eta olmaydi. Biz sharoitlarni to'g'rilatishimiz kerak. Bu kabi sharoitda futbol o'ynab bo'lmaydi. Sekeyra va Xuistraning gaplariga keladigan bo'lsak, sharoit yomon bo'lsa gapirish kerak, ammo qandaydir misollar keltirish xato, deydi «Nasaf» ustozi o'yindan keyingi matbuot anjumanida.