Puyol "Real" bilan kechgan eng yaxshi o'yinini esladi

"Barselona"ning sobiq sardori Karles Puyol "Real"ga qarshi o'yin oldidan o'zi uchun eng esda qolarli klasikosini yodga oldi.

"Agar men faqat bitta o'yinni tanlashim kerak bo'lsa, "Santyago Bernabeu"dagi 6:2 hisobidagi g'alabamiz bilan yakunlangan o'yinni tanlayman. O'yin, natija va g'alaba bizga chempionlikni deyarli kafolatlagani uchun.

Qo'shimchasiga o'shanda gol urib, hisobni o'z foydamizga 2:1 qilib qo'ygandim. Bu men uchun alohida lahza bo'lgan. Men unchalik ko'p gol urmasdim. Ammo klasikodagi gol o'zgacha voqea”, - dedi Puyol "Marca" nashriga bergan intervyusida.

Eslatib o'tamiz, bu o'yin 2009 yil 2 mayda bo'lib o'tgan. O'shanda “Barsa” safida Jerar Pike 1 gol urgan bo'lsa, Terri Anri va Lionel Messi dubl qayd etishgan. Gonsalo Iguain va Serxio Ramos "Real"ning javob gollari muallifiga aylangan.