Diyor Imomxo'jaev: «Turon» — yaxshi loyiha»

«Turon» — yaxshi loyiha. U qisqa vaqt ichida nafaqat o'z atrofida, balki boshqa viloyatlarda ham hurmatga sazovor bo'lishga erishdi. Bu eng muhim jihat. Ko'pchilik klub Pro ligaga tushib ketmasligini istayapti. Vaholanki, katta natijalarga erishib ham muxlislar mehrini qozonmagan klublar haqida siz yaxshi bilasiz.

Pro liga bu hayotning tugashi emas. Har birimiz urishni bilganimiz kabi, yiqilishga ham tayyor turishimiz lozim. Yiqilmaydigan odam emas, yiqilganida ham qaytib oyoqqa tura oladigan odam kuchlidir. Har bir qabul qilgan zarbamiz bizga og'riq bilan birga dars ham beradi. Bundan xulosa chiqarishimiz va yo'l qo'yilgan xatolarni takrorlamasligimiz muhim.

Menga Turon bilan bir qatorda 15 yil avvalgi «Bunyodkor», «Mash'al», 5 yil avvalgi «Obod», 1 yil avvalgi «Istiqlol», hozir mavjud bo'lgan «Andijon», «Nasaf» loyihalari ham yoqadi. Agar hammamiz to'g'ri ishlaganimizda, biz ularning aksarini saqlab qolishimiz mumkin edi. Afsuski, ularning ayrimlari haqiqat topa olmasliklariga ishondi va futboldan qo'l siltab yubordi. Ayrim noinsof kishilar tomonidan barpo etilgan piramida nafaqat ularni yiqita oldi, balki katta arboblarning ham millionlar o'yinidan sovushiga olib keldi.

Bizning sohada fitnalar ko'p. Biz ularga qarshi har kun, har soat kurashamiz. Natijasi muhim emas, muhimi kurasha olayotganimiz. Biz «Turon»ni ham shunga chaqiramiz va ishonamizki, uning asoschilari o'z g'oyalarini amalga oshirish uchun oldinga yurishda davom etadi. Va albatta hamma yaxshi tushunishi kerakki, yaxshi loyihalarni saqlab qolish uchun sport printsiplaridan voz kechilmaydi. Qonunlar, qoidalar oldida hamma bir bo'lishi eng muhim jihat.

Bugun o'zgarishlar bor. To'g'ri yo'ldagilar ba'zida g'olib keladi, ba'zida esa yo'q. Axir «Turon» ham yil avval katta g'alabaga erishdi, to'g'ri yo'nalish g'olib chiqdi. Keyingi qaytish yanada kuchliroq, yanada aqlliroq bo'lishi shart. Shunday ekan, niyati toza kishilarga birgina hitobimiz bor: hech qachon taslim bo'lmang. Ming mashaqqatli bo'lsa ham, ming uzoq bo'lsa ham — baribir to'g'ri yo'ldan yurish kerak. Bu bizga ichki xotirjamlik beradi. Shu kungacha bundan ham ulug'roq baxtni ko'rganim yo'q.

Diyor Imomxo'jaev

Manba: https://t.me/diyorimamkhodjaev