O'zbekiston 2023 va 2024 yillar uchun OChL kvotasini oshirdi

"Nasaf"ning muvaffaqiyatli yurishi natijasida O'zbekiston OFK koeffitsientlar jadvalida o'z hisobiga muhim ochkolarni qo'shib qo'ydi.

Mavsum boshida "Paxtakor" va AGMKning Osiyo chempionlar ligasi guruh bosqichidagi ishtiroki orqali to'plagan ochkolarni qo'shib hisoblaganda, O'zbekiston G'arb mintaqasida 2021 yilda eng ko'p ochko jamg'argan ikkinchi mamlakat bo'ldi — 22.180 (eng ko'p ball Saudiya Arabistonida — 25.590). Natijada mamlakatimiz G'arb mamlakatlari reytingida 4-o'ringa ko'tarilib oldi va bu natijani saqlab qoladi. Bu esa bizga 2023 va 2024 yillarda OChL uchun "2+2" ko'rinishidagi kvotalarni ta'minlaydi. Ya'ni O'zbekiston chempioni va O'zbekiston kubogi sohibi to'g'ridan-to'g'ri guruh bosqichida ishtirok etsa, yana 2 klubimiz saralash bosqichida ishtirok etadi.

Afsuski, reytingni hisoblashda 2020 yilgi natijalar inobatga olinmadi (OFK kubogi musobaqasi o'tkazilmagani sababli). Aks holda O'zbekiston OFK reytingining G'arb mintaqasida 2-o'ringa ko'tarilgan va "3+1" kvotasiga ega bo'lgan bo'lardi.

Eslatib o'tamiz, O'zbekiston 2022 yilda "1+1+1" ko'rinishida o'rinlarga ega bo'lib, "Paxtakor" OChLning guruh bosqichida ishtirok etish huquqini hal qilib bo'ldi. Qolgan yo'llanmalar esa qaysi jamoaga nasib etishi haqida avvalroq xabar berib o'tgandik.

OFK reytingi. G'arb mintaqasi jadvali

Manba: stadion.uz