Jasur Jaloliddinov "Andijon"ga qarshi o'yindan oldin o'z fikrlarini bildirib o'tdi

"Lokomotiv" yarim himoyachisi Jasur Jaloliddinov sobiq jamoasiga qarshi o'yin oldidan qisqa fikrlarini bildirib o'tdi.

- Birinchi davrani "Andijon" tarkibida o'tkazdingiz. Umuman olganda futbolchining sobiq jamoasiga qarshi o'ynashi qanchalik qiyin?

- Qiyin tarafi yo'q. Ayni damda ochko barchaga suv va havodek zarur. Shu sababli "Andijon" so'nggi turlarda ochkolar uchun borini berib o'ynamoqda. Biz esa so'nggi ikki o'yinda irodali g'alabaga erishdik. Ikki jamoaning ohirgi o'yinlariga nazar tashlaydigan bo'lsak, bugun qiyin o'yin bo'lishi shubxasiz.

- "Mash'al"ga urilgan golingizni yana takrorlash niyatingiz bormi?

- "Jo'jani kuzda sanaydilar" deganlaridek, barcha narsaning sarhisobini beradigan vaqt yaqinlashmoqda. Ayni damda kim gol urishining ahamiyati yo'q. Muhimi g'alaba qozonib, uch ochko olsak bo'lgani. O'z o'yinlarimizda g'alaba qozonaversak, turnir jadvalida yuqoriga ko'tarilamiz. Oldindagi 5 o'yinda qiyin raqiblarga qarshi o'ynaymiz. Ushbu o'yinlarda maksimal ravishda ochko olishga intilamiz", - dedi yarim himoyachi.

Manba: FC Lokomotiv