Klassik to'qnashuv. Joze Mourino yigitlari Maks Allegri armiyasiga qarshi (prevyu)

Musobaqa: Italiya chempionati
O'tkazilish vaqti: 2021 yil, 17 oktyabr, yakshanba soat 20:45(23:45)
O'tkazilish joyi: "Allianz Stadium" o'yingohi, Turin, Italiya
Bosh hakam: Daniele Orsato
Jonli efir: Sport TV (MTRK)

"Yuventus" bugun o'z maydoni "Allianz" stadionida "Roma"ni qabul qiladi. "Keksa sinora" ushbu bahsga oldingi turda, Turin derbisida Ivan Yurichning "Torino"sini engib etib keldi. Bu bahsda Manuel Lokatelli urgan yagona gol "oq-qora"larga ustunlik taqdim etgandi. "Roma" esa o'tgan turda Avrelio Andreazollining "Empoli"sini 2-0 hisobida dog'da qoldirgan edi. Lorenso Pellegrini hamda Genrix Mxitarianlarning goli Joze Mourino jamoasiga uch ochko olib keladi.

"Yuventus" hozirda jadvalning 7 pog'onasidan o'rin egallab turibdi. Jamoaning mavsum starti unchalik ham omadli kechmadi. Klub Allegrini yana olib keldi va Ronalduni sotib yubordi. Bu esa Turin klubida qayta qurish jarayoni boshlanganini anglatadi.
"Roma" ham o'ziga xarizmatik murabbiy Joze Mourinoni yangi boshliq qilib tayinladi. Portugaliyalik mutaxassisning ishlari so'nggi yillarda yaxshi kechmayapti. Ammo uning jamoasi Italiya A seriyasida hozircha 4 o'rinda bormoqda.

O'zaro o'yinlarlar

So'nggi 33 ta o'zaro bahsni olib qaraydigan bo'lsak, bu juftlikda "Yuventus"ning qo'li yaqqol baland kelganini ko'rishimiz mumkin. Ular bu davrda 19 ta g'alaba qayd etib, 8 ta mag'lubiyat va 6 marta durang o'ynagan. Har ikki klub shu yilning fevral oyida so'nggi bor to'qnash kelgandi. O'shanda "Roma" 2-0 hisobida mag'lub etilgan. Ronalduning goli va rimliklar tarkibidagi himoyachi Ibanesning avtogoli turinliklar g'alabasini ta'min etgan.

Yo'qotishlar

"Yuventus" bu o'yinda frantsuz yarim himoyachisi Adrian Rabo xizmatlaridan foydalana olmasligi ma'lum bo'lgan. Shuningdek, maydonga tushishi so'roq ostida bo'lganlar orasida amerikalik Ueston Makkenni, argentinalik hujumchi Paulo Dibala hamda ispaniyalik strayker Alvaro Moratalar mavjud. Qolgan tarkib futbolchilarida aytarli muammolar mavjud emas. Shunday bo'lsa ham Allegri ideal tarkibni maydonga tushirishga umid qilmoqda. Ushbu jamoada:
Jarohatlanganlar: Adrian Rabo
So'roq ostidagilar: Ueston Makkenni, Alvaro Morata, Paulo Dibala
Chetlashtirilganlar: Yo'q

Bu bilan bir paytda "Roma" ustozi Joze Mourino himoyachilar Spinatstsola hamda Kris Smolling xizmatidan foydalanish imkonidan mahrum bo'lgan. Shuningdek, tarkibda hujumchilar Temmi Abraxam va Nikol Zanolo, yarim himoyachi Lorenzo Pellegrinilar ushbu o'yin uchun tanlanmasligi mumkin. Shunday qilib, romaliklar tarkibida:
Jarohat olganlar: Kris Smolling, Leonardo Spinatstsola
So'roq ostidagilar: Nikolo Zanolo, Temmi Abraham
Chetlatilganlar: Yo'q

Jaloliddin ISMATOV tayyorladi