Namangan futbol mahorat maktabi Rimning «Roma» futbol klubi bilan hamkorlik qiladi

Bugun Namangan viloyati Turizm va sport bosh boshqarmasi tashabbusi bilan O'zbekiston futbol assotsiatsiyasi raisining birinchi o'rinbosari Ravshan Ermatov, Italiyaning «Roma» klubi tijoriy masalalar bo'yicha direktori Marko Dominiks hamda Ispaniyaning IMG kompaniyasi vakili Karloz Perez ishtirokida videomuloqot o'tkazildi.

Muloqot davomida xorijliklar O'zbekistonda, xususan Namanganda futbol sohasini yanada rivojlantirish, ushbu sport turiga aholi, ayniqsa yoshlarni keng jalb qilish, futbol infratuzilmasini kuchaytirish, Namangan futbol maktablari faoliyatini yangi bosqichga olib chiqish, sohada malakali mutaxassislarni tayyorlash, Namangan viloyatida o'tkazilayotgan musobaqalar saviyasini yuksaltirish bo'yicha amalga oshirilayotgan keng ko'lamli ishlar yuzasidan xabardor qilindi.

Muzokaralar davomida Namangan futbol mahorat maktabi hamda «Roma» klubi o'rtasida futbol bo'yicha mutaxassislarni tayyorlash yo'nalishida o'zaro tajriba almashish, qo'shma seminar va treninglar tashkil etish, Namanganlik futbol murabbiylarini «Roma» futbol klubida malaka oshirish imkoniyatlarini o'rganib chiqish masalalariga alohida e'tibor qaratildi. Shuningdek, Namangan va Rim klubining yoshlar jamoalari o'rtasida o'rtoqlik uchrashuvlarini tashkil etish tashabbuslari ilgari surildi.